Кьве вах
Мах Мах  |  11(305) 2016      
     Хьана кьван, хьанач кьван Мислиматни Узнифат тIварар алай кьве вах. Бубади вахар чIехи хьа­йила  арада мидявал гьат тавурай лагьана абуруз кьведазни сад хьтин кIвалер эцигна ганай. Мислимата йифиз-юкъуз кIвалахна вичин кьил хуьдай, бубади гайи кIвал генани гуьн­гуьна хутаз алахъдай. Алакь тийир кар авачир адалай. ЧIижре хьиз датIана кIвалахзавайвиляй кандуярни ацIана жедай Мислиматан. Заха я лугьуз адан кIваляй  мугьманар кими жедачир, вичелай алакьдай хъсанвилер рикIин сидкьидай ийидай ада вирибуруз. Къени къилихар, верцIи мез авай ам гзаф кlандай хуьруьнбуруз.
     Гьа и крар акваз Узнифатавай эхиз жедачир. Пехилвили адан рикIе муг авунвай. Квелинвили тlушуннаватIани вич тахсирлу яз аквадачир адаз. Мез къацу хъархъар кьван туькьуьл тир Узнифатан, гьавиляй адав садани кьил кьадачир.
     Мислимата вахаз куьмек гуз алахъдай, ин­гье пехил Узнифатаз ам аквадай вил авачир. Садра Узнифатаз да­кlардай картуф­рив ацlанвай шеше­лар  ламрал эцигна хквезвай Мислимат акуна:
     - Вун гьинай хквезва?- жузуна Узнифата вахавай.
     - Салай. Килиг садра, вуна гадарай «ктIай» картуфри гьи­кьван бегьер ганатIа! Ваз цаз кIандачир. Са пай види я. Ша, къахчу.
     Узнифатак хъел акатна, вичи-вичиз фикирна: «Авай бахт аку тIун! КтIай картуфрини галаз бегьер гузва адан 
гъилик».
     Фена пехил Узнифат Кус­кафтардин патав,  тамуз. «Вахан бахтунин чарх муькуь патахъ элкъуьра», - лагьана тIалабна ада Кускафтардивай, тупIук галай тупIални хкудна гана адаз.
     Кускафтарди адаз лагьана:
     - Пака вахахъ галаз санал амай картуфар хкудиз вач. Чиликай кьве сандух жагъида квез. Абурукай сад хъсанвилерив, муькуьди писвилерив ацIанва. КIарасдин цlуру, патар алатнавай сандух жуваз къачу, иер, цIийи, гимишдин рангунин сандух вахаз хьурай. Гьа сандух ацIай писвилери ви вахан юкь хада. 
     Пакагьан юкъуз вахари чил эгъуьнна картуфар хкуддамаз чиликай кьве сандух хкатна. Узнифата тадиз кIарасдин сандух вичихъ ялна «им заз!» лагьана. Вахан захавал акваз Мислимат вичин вилерин чIалахъ хьанач.
     «Вуна лагьайвал хьурай,» - лагьана нехишар алай сандух къачуна ада.
      Югъ няни хьанвай. Гьавиляй абуру сандухар кIвале ахъаюн кьетIна. КIвализ хъфидай рекъе Узнифата фикирна: «Акьван иер сандухдин къене писвилер жеч гьа! Ништа къе­не вучар аватlа. Мислиматаз бахт авайди я. Адан сандух сиве-сивди къизилрив ацIанвай хьтинди я». 
     И фикирди сакIани секинвал гузвачир Узнифатаз. Кьуланфериз, хуьр ксайла ам садазни таквадайвал вичин сандухни гваз фена вахан дакIардихъ. Инихъ-анихъ килигна кIвенкIе къуьнеллай сандух кIвалин къенез вегьена, гуьгъуьналлаз вични гьахьна.
     Са гужуналди жагъана адаз иер сандух. Мислимата ам ахъайнавачир. Узнифат фад цIийи сандух кьуна атай рехъ тирвал хтана вичин кIвализ. 
Адаз вичи чуьнухнавайди писвилерив ацанвай сандух тирди чизвачир. Вичин мискьивили юкь хана адан.  Мислиматаз лагьайтIа, сан­дух ацIай хъсанвилер кьисмет хьана.
 
АЗИЗРИН Севда

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я 25 йисан женг Görkəmli alim РикIелай тефир мярекат Кьегьал
Статьи из этой рубрики
Хъсанвилиз писвал Жив такур гъед Гатфар Хъсанвилихъ ялун КьантIа
ЦIИЙИ ТИЛИТ
№: 11(316)
декабрь, 2017

Скачать PDF

РУБРИКИ

ПОЛЕЗНОЕ