Газета Самур

Кьегьал
Чешне къачу! | 11(305) 2016

Дуьньяда кьегьалвилиз гьамиша вахт ва чка жагъида. Ада яшдизни килигдач. За квез вичикай ихтилатзавай жегьилдин уьмуьрдини икI тирди тестикьарзава.

Редакциядиз са жегьил атанвай. «Самур» зи рикI алай газет я. Адан коллективдихъ галаз таниш хьун зи мурад тир», - лагьана ада хвешиз-хвешиз. ГъвечIи-чIехид чидай и къени къилихрин гададин савадлувал адан акьуллу ихтилатрай чир жезвай. Ам адетдин жегьилрикай туширди гьасятда кьатIана за. Исмаиллы райондин тарихда сифте яз 615 балл кIватIна Азербайжандин НафтIадинни Санайидин Университетдик экечIнава лугьуз ваъ. Дамах гвачиз, чина хъвер аваз рахазва лугьузни ваъ. Зегьметдал лигим хьанва лугьуз!

Асим Алисултанов Исмаиллы райондин Къалажух хуьре дидедиз хьана. Адахъ вичелай чIехи пуд стхани са вах ава. Абурукай садани юкьван мектеб куьтягьайдалай гуьгъуьниз кIелун давамарнавач. Асиман лагьайтIа аял чIавалай кIелунал рикI алай. Къунши Жангъу хуьре 7 синиф акьалтIарай ам вири райондиз сейли тир Сумагъаллы хуьре кIелун давамардай фикирдал атана. Инин муаллимри аялриз рикI алаз тарс гузвайди, гьар йисуз инай гзафбур чIехи баллар кIватIна институтрик экечIзавайди ван хьанвай гададиз.

Адан буба, Бакуда нафтIадин мяденра кIвалахиз, четинвилелди ризкьи къазанмишиз хизан хуьзвай Мегьман чIалал атана:

- Чан бала, язух тушни ви? 7 йисуз Жангъудиз физ-хтана вун. Анаг гена са акьван яргъа тушир. Гила 3 йисузни Сумагъаллыдин рекье жедани? Инай аниз 8 километр я. Гьар юкъуз 16 километрдин рехъ жезва. Кьуьд ава, гад ава. Чуьлдин вагьши гьайванрал дуьшуьш хьун ава.

- Ана хъсан муаллимар ава. Четинвилериз за таб гуда, - жаваб гана Асима.

Гьар юкъуз Къалажух хуьряй Сумагъаллыдиз физ-хквезвай, кIелунал рикI алай гададин тарифар вириниз чкIана. Гьафтеда кьудра ада и рехъ гьар юкъуз кьведра кьетIзавай - нисинлай кьулухъ алава чирвилер къачузвай ада. Йикъа 32 километрдин рехъ атIузвай и гададал муаллимрини, синифдин юлдашрини дамахзавай.

Ада 615 балл кIватIна лагьай хабар ван хьайила 3 хуьруьн - Къалажух, Жангъу ва Сумагъаллыдин жемятри вирида сад хьиз лагьана:

- Гьалал хьурай вичиз! Икьван зегьметдал рикI алай, икьван къени жегьил акунач чаз!

Асима лагьайтIа, вичин агалкьунар Сумагъаллыдин муаллимрин гьунар я лугьузва. Арзу Мирзеева, Фуад Халилов, Арзуман Керимов ва маса муаллимар хьаначиртIа, вичивай акьван баллар кIватI жедачир лугьузва.

Эхь, икI тирди чазни чизва. ТахьайтIа алай йисуз и мектеб акьалтIарай 9 аялдикай 6 институтрик экечIдачир. Тек Педагогикадин университетдиз гьа са синифдай 3 руш - Айтаж, Хеяле ва Бегьрузе кьабул хьанва.

Эхиримжи йисара и мектебдин суракьар яргъариз акъатнава. Ам тек Исмаиллы райондин ваъ, гьакIни республикадин виридалайни хъсан мектебрин жергедик акатнава. И агалкьунрик мектебдин коллективдин чIехи пай ква.

Чна Сумагъаллы мектебдин вири муаллимриз чIехи агалкьунар тIалабзава. Девирдин четинвилериз килиг тавуна муаллимдин тIвар вине кьазвай, халкьдин веледар савадлу авун патал чан эцигзавай квез баркаллагь! Чна квелди дамахзава. Куьн хьтин инсанар аватIа Асим хьтин кьегьаларни гзаф жеда чахъ.

С.КЕРИМОВА