“Самур” хуьн викIегьалвал я
Чи тавдин кIвал  |  10(304) 2016      
     И йикъара чи редакциядин мугьман хьайи КцIар райондин Мучугъ хуьряй тир кхьираг Агъаверди Аливердиеван сифте гафар ихьтинбур хьана: «Самур» газет хуьн викIегьалвал я.» Ибур дуьшуьшдин гафар туш, - лагьана кхьирагди, - «Самурди» вегьей сифте камар, гуьгъуьнлай ам кьериз-цIаруз акъатай йикъар, газет кIевера гьатай береяр зи рикIел хъсандиз алама. Ингье 1997-йисуз чи журналистар тир Седакъет Керимовади ва Муьзеффер Меликмамедова «Самур» акъудун давамарда лагьана хиве кьуначиртIа, газет кIевирун мумкин тир. Вуч хъсан я хьи, ам кIев хьанач, акси яз виликандалай генани хъсандиз, генани марагълуз акъатна.
     За авайвал лугьузва, вичин метлеблувални тартиб фикирда кьуртIа, къе чи республикада «Самурдив» къведай газет авач. Гьайиф хьи, чун адав герек тир кьван кIанивиливди эгечIзавач. Газет кхьин, адаз куьмек гун къе гьар са лезгидин буржи я, вучиз лагьайтIа ам чи халкьдин аквадай вил, рахадай мез я. Шумуд йисар я газетди икьван гагьди чаз тийижир тарихар винел акъудиз. «Самур» чи чIалан михьивал хуьзвай, ам вилик тухузвай чIехи женгчи я. Газетди чи медениятдикай, адетрикай, ацукьун-къарагъуникай гьикьван хъсандиз кхьизва. Ада чак дамах кутазва. Чаз ихьтин газетдин къадир хьунухь герек я. 
    - Агъаверди муаллим, Куьне ихтилатдик газетдилай вучиз кьил кутуна? - лагьана жузуна чна.
     Ада гьа вичин саягъда, чина хъвер аваз, ван алаз лагьана:
    - Я хизан сагъ хьайибур, чахъ исятда газет кьван кар алай маса месэла авани? Газет тушни алай вахтунда чаз чи чIал, чи лезгивал хуьз куьмек гузвайди?          Садни, виликай «Самурдин» 25 йисан юбилей къвезва эхир. Чун лезгияр жуван хайи газетдин къадир авайбур тиртIа, адан тираж къе 2000 ваъ, 25000 хьун герек тир.
      Гьахъ гафуниз вуч лугьуда кьван. Виликай къвезмай йисан январдиз «Самур» акъатиз 25 йис тамам жезва. Са гафни авачиз, ам мад 25 йисуз ва генани гзаф йисара хуьн патал чна гьар сада хъсандиз фагьумна кIанзава. Им кьилди давамарна кIанзавай ихтилат тирвиляй чна кхьирагдивай вичин яратмишунрикай лугьун тIалабна:
    - Алай вахтунда Куьне вуч кхьизва?
    - И йикъара за жуван цIийи ктаб чапдиз гьазурнава. Адак гьикаяяр ва яргъал йисарин рикIел хкунар акатнава. Гьикаяйрин тема алай девирдин чахъ къалабулух кутазвай месэлаяр я. Са бязи гьикаяяр инсандин къенепатан алем, адан фикир-фагьумар ачухарзавайбур я, лугьуз жеда. Жува кхьенвайбурукай за вуч лугьун, ктаб чапдай акъудун кьисмет хьайитIа,  кIелдайбуру чпин гаф лугьурай.
     - Куьн гьакIни чаз лезги чIалан кьериз-цIаруз менфят къачузвай, рикIелай ракъурнавай гафар кIватIзавай къелемэгьли хьиз чизва. Куьне ихьтин гафар мадни кIватIзавани?
    - Эхь, кIватIзава. За «Самурдин» «Гафалаг» рубрикадик кваз газетдиз акъудун патал са кьадар гафарни гъанва.
Килигна чна а гафариз. «Гафалаг» рубрикадиз кутугайбур тир. Кхьирагдиз разивал къалурна, адаз уьмуьрда ва яратмишунра цIийи агалкьунар тIалабна чна.
 
Айнур БАЙБУЛАТОВА

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я Къул туьхуьр мийир «Леки» - кьегьалрин кIватIал я Zabit Rizvanov fenomeni Бадейрин кьула
Статьи из этой рубрики
С любовью к родному языку Жегьилар ва интернет Мурад кьилиз акъатна Редакциядин мугьманар Жуванбурун къайгъуда
ЦIИЙИ ТИЛИТ
№: 8(324)
сентябрь, 2018

Скачать PDF

РУБРИКИ

ПОЛЕЗНОЕ