Къул туьхуьр мийир
Редактордин гаф  |  10(304) 2016      
     Са береда зи виридалайни рикI алай кIвалахрикай сад лезги хуьрериз фин тир. Дагъларин ценерив, тамарин, багъларин мукьув экIя хьанвай и гуьлуьшан чкайри датIана эвердай заз. Тек са тIебиатдин иервилери ваъ, гьакI анра уьмуьр гьалзавай чи ватанэгьлийрин ацукьун-къарагъунри, абурун къенивилери, элдин адетриз амал авуни руьгь кутадай зак. Гурмагърай гум акъатзавай  кIвалер, аялрив ацIанвай гъенер акьван рикIиз чими тир хьи! Нин ракIар гатана къенез гьахьайтIани, чими къулар хъуьредай чиниз. Берекат, регьятвал, аваданвал аквадай ваз.
     Эхиримжи вахтара физ кIанзамач заз хуьрериз. Вучиз лагьайтIа эвелан дад кумач абурухъ. Кьуьзуьбур жерг яна ацукьдай кимер ахквадач ваз хуьрера. Эвелан эл агуддай мелерал дуьшуьш хъжедач вун. Хуьруьнвийрин къилихарни дегиш хьанва. Виликан хьиз са-садан кIвалериз фин-хтунар амач хуьруьнвийрихъ, арадай къванцин паруяр хкажна гьарад вичин гъвечIи дуьньяда гьахьнава.
     Акваз-акваз къилихар дегиш жезва инсанрин. Зегьметдив дигай виликан хуьрер амач. Жегьиларни, яшлубурни кагьул хьанва. Эгь, и кардиз эхиз жез тир, эгер чи ватанэгьлийри вирида сад хьиз чпин кIвалерин, чилерин къайгъу чIугунайтIа. Гила рикI тIардай маса кар хьанва. Акваз-акваз къулар туьхуьзва. Гурмагъдай гум акъатзавачир кIвалерин кьадар къвердавай пара жезва. ДакIаррай йифиз экв ахквазмачир кIвалери рикI тIарзава. Иесияр иниз-аниз куьч хьана, ичIиз амай кIвалерин акунри шел гъизва инсанриз. КIвалерин фадлай эгьенг такунвай цлари, абурун ранг алахьай шуьшебендри, эчIелри кьунвай гъенери, яд авачиз кьуразвай багълари гъам гъизва.
     Са береда чи дагъдин хуьрер и гьалда авай. Рекьер авачиз инсанар хуьрерай катзава лугьузвай. Гила КцIарин мукьув гвай, рекьер асфальт тир, газдив, цив таъмин хьанвай хуьрерай куьч жезва инсанар. Алатай гьафте ГадацIийихуьре ракIаррикай куьлегар куьрсарнавай шумудни са кIвалер акуна заз. Бубад кIвалин экв туьхуьрна яргъариз акъатзавайбуру къвердавай гел атIузва хуьруькай. Гзафбур гатун варцарани хквезмач хуьруьз. Гьа икI,  квадариз вердиш хьанва чун. Чахъ квадар тавур вуч ама? 
     Гила чи хуьрериз фейила виш йисар вилик чи зурба шаир Куьре Мелика тIал кваз лагьай цIарар рикIел хквезва зи: «Эй лезгияр, къул хуьз эгечI!»  
 

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я «Леки» - кьегьалрин кIватIал я Zabit Rizvanov fenomeni Бадейрин кьула РикIел хуьх!
Статьи из этой рубрики
Чешне яз къалурна ЧIехи хьанва Пара жезва Жегьилрин меркез Кьве гъвечlи аял
ЦIИЙИ ТИЛИТ
№: 7(312)
август, 2017

Скачать PDF

РУБРИКИ

ПОЛЕЗНОЕ