Газета Самур

Баркаллагь
Редакциядиз чар | 9(303) 2016

Чи бубайри лагьайвал, хуьруьз яд гъун, муьгъ эцигун, багъ кутун суваб кIвалахар я.

И мукьвара Хачмаз райондин Мукьтадир ва Велемир хуьрерин агьалияр патал рикIелай тефир са кар хьана. Чи хуьруьнэгьли Гьажи Шингъаран хци, хуьре юкьван мектеб акьалтIарна Москвада кIелай, алай вахтунда гьана яшамиш жезвай Шихали Шингъарова вичин ватан садрани рикIелай алудзавач, адан хийирдикай, шийирдикай хкатзавач.

И мукьвара Шихалидин тIалабуналди Гьажи Шингъаран хизанди чпин такьатралди 4-5 км кьван яргъа авай, барбатI гьалдиз атанвай артезиандин къуй гуьнгуьна хтуна адан яд Мукьтадир ва Велемир хуьрерин вири куьчейриз гъана.

3000-дав агакьна агьалияр яшамиш жезвай и хуьрер патал им чIехи савкьат я. И суваб кар кьилиз акъуддайла беледиедин кIвалахдар Исмеддин Къудратовани гзаф зегьмет чIугуна. Ада вири кIвалахриз регьбервал гана.

Гьажи Шингъаран хайибуру гьар йисуз вири суварриз 25-дав агакьна кесиб хизанриз куьмек гузва, абуруз гъуьр, чIем, шекер, чай, як пайзава. Ихьтин, датIана Аллагь рикIел алаз жемятдиз куьмек гузвай хизандиз вирида баркаллагь лугьузва.

Чна лезги кьегьал Шихалидиз, гьакI адан вири хизандиз баркаллагь лугьузва, абуруз чандин сагъвал, рикIин шадвал тIалабзава.

Малидин ШИХКЕРИМОВ,

Хачмаз райондин

Мукьтадир хуьр,

пенсиячи муаллим