Гъетер
Мах  |  8(302) 2016      
     Са береда варз цава кьилди яз авай. Ялгъузвили кьарай атlуз­вай адан. Цавай агъуз килигайла, ана лугьуз-хъуьрезвай, шадвилелди уьмуьр гьалзавай инсанарни гьайванар акваз генани къекъифзавай варз.
     «Бахтаварар! Захъни дустар хьанайтlа, хупl хъсан тир», - лугьуз хиялри тухудай ам.
     Садра, варз гьамишанди хьиз йифиз цавукай куьрс хьанвай чlавуз, агъадихъ квай чlехи виряй цIугъдай ванер атана адаз. Гъвечlи лацу гъе­тер чпел вегьенвай чlехи гъетрен сарарик акатуникай кичlела, гьарай ацалтна катзавай. Абур гагь санал кlват жез, гагь гьарад санихъ чикlиз, адан кьил алцурариз алахъзавай.
     Гъетерин и гьал акваз язух атай вацра лагьана:
     - Галатначни куьн кичlевиле умуьр гьалуникай? Икьван иер куьн рагъул ятара терг жезва хьи! 
     - Чун чи чандин дердида ава. Иервал нин рикlел ала?!  - жаваб гана гъетери.
     - За куьн зи кьилив, цавуз ялайтlа гьикI хьурай? Кlеви дустар жедай чун. Ингье са кар ава хьи, юкъуз куьн садазни аквадач.  Куьн йифен мугьманар жеда. 
     - Чун тахьайтlани юкъуз аквазвайди туш, лужуна аваз ксузвайди я. Цав кIандачаз, бес аниз гьикl акъатда?
     - АкI ятIа яб акал. Ацlай варз авай йифиз зун чиливцlардив агатда. Зи виликай хьиз, цин винелай вац­ран рехъ ахъа жеда. Гьа рехъ кьуна куьне зун галайнихъ сирнав ая. 
     И ихтилат чилин гьайванризни ван хьана. Садни и кар тlуькlуьдайдан чlалахъ тушир. Гьавиляй и кардин эхир гьикI жедатlа акваз кlанз ацlай вацран рехъ хуьз хьана абуру.
     Са шумуд йикъалай ацlай варз цава акурла, гьйванар вирин кьерел кlватl хьана. Варз, вичи лагьайвал, агъуз хьана чиливцlардив агатна. ГъвечIи гъетери вацра чирайвал, цин винел аквазвай вацран рехъ кьуна, ам галайнихъ сирнавна. Абур къвер­давай гъвечIи жезвай. Са герендилай абурун гелни амачир. Кьуд патаз лугьуз тежер секинвал чкlанвай. Гьайванар пагь атIана, сад-садаз килигиз амай. 
     Садлагьана варз цавуз хкаж хьана, ам фарфалаг хьиз са чкадал элкъвез эгечIна. Ам элкъуьнивай кьуд патаз цlарцlар гузвай гъетер чикlизвай. Чпикай са геренда цавун гъетер хьанвай абуру хвешивиляй вацралайни гзаф экв гузвай. Цав лугьуз тежер кьван иер хьанвай.  
     Чилелай и аламатдин кардиз килигзавай гьайванрин пагь атIана.  Гьабурузни гъетери хьиз цава цlапIрапIар гуз кlанзавай.  Чебни тухурай лугьуз жанавурди къуй ягъиз­вай, хъи­перилай къур-къурдин ван алахьзавай, чlигъичlигъри хордив гьарайзавай.  Вацраз лагьайтlа, вичин цlийи дустар авай чкада мад садни ахквазмачир.
     Гъетер чпин цlийи кlвалел ашукь хьанвай, ина абурухъ садани кяйзавачир. Акур-акурда абурун иервилиз килигиз, рикlе мурадар кьазвай.
Гьа йикъалай вацраз теквал вуч ятlа чир хъхьанач.  Гила адахъ вич садрани ялгъуз тадачир, рикl аладардай дустар авай.
Жанавурар, хъиперни чlигъи­чlигъар лагьайтlа, гьа бередилай гьар варз акъатайла цавуз килигиз, пехилвиляй жуьреба-жуьре ванер акъу­диз жеда.
 

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я Иер жезва КцIар Aялриз хвеши жеда Большой вклад в историю Холодное солнце
Статьи из этой рубрики
Жив такур гъед Хъсанвилиз писвал Гатфар Жанавур жез кIан хьайи хеб Цекверин тарс
ЦIИЙИ ТИЛИТ
№: 3(319)
апрель, 2018

Скачать PDF

РУБРИКИ

ПОЛЕЗНОЕ