Са шаир квадарна чна: вичин рехъ, вичин хатI авай шаир. Дерин фикиррални, иер тешпигьралди чи шииратдик пай кутур Медет Эрзиманов кьиникьи чавай къакъудна.

     Эрзиманов Медет Судьябеган хва 1951-йисуз КцIар райондин Ман­къулидхуьре дидедиз хьана. Ада хайи хуьре юкьван мектеб акьалтIарна. М.Эрзиманов вичихъ чIехи алакьунар авай шаир тирди адан шииррихъ галаз таниш хьайибуру гьасятда кьатIуда. Вичин махсус образар авай, дидед чIалан иер гиширралди абур къелемдиз къачур шаирди кIелдайбурун рикIера гел туна. М.Эрзиманован эсе­рар Азербайжандин ва Дагъустандин газетризни журналриз акъатна. «Самур» газетдин кIелдайбуруз адан миже квай, рикIел аламукьдай шиирар хъсандиз таниш я. 

     Къедалди вичин са ктабни акъат­навачтIани, поэзиядал рикI алайбуру адан шиирар хуралай кIелзава. Худат шегьерда яшамиш жезвай шаир яргъалди фейи начагъвал себеб яз алай йисан 19-июндиз рагьметдиз фена. Аллагьди рагьмет авурай!

 

“САМУР”