Жанавур жез кIан хьайи хеб
Мах  |  5(299) 2016      
     Сувун ценерив гвай къацу яйлахда хипер чIуруз акъуд­навай хипехъанри вацlун кьере ацукьна ихтилатдал илигнавай. Тарта кицlери хиперилай вил алудзавачир. Са хипре вичин уьмуьрдикай веревирдер ийиз, секинвал квадарнавай. «Йикъар вири гьа сад хьтинбур я. Накьанан югъ къениндаз, къенинди пакагьандаз ухшар я. Са цlийивални авач. Хипехъанри къалурай чкадал векь неъ, чтарта кицlеривай яргъа жемир! Ихьтин кар женни?  Хеб хьунухьи бахтар гъанач заз. Жув са жанавур хьанайтIа хъсан тир… Масадан гъи­лик жедачир. Кlандай чкадиз физ, кlандайвал къекъведай. Акурбурни жувакай  кичlела зурзадай».
     Йиф алукьнавай. Хипер къвал-къвалаваз яна ахвариз фенвай. Хипехъанарни япунчийрик аруш хьана ксанвай. И хипрен вилиз сакlани ахвар физвачир. Садлагьана адаз хипехъанри чlехи къванцел экIянавай жанавурдин хам акуна. Садазни таквадайвал ам кьуна катна.
- Мад за ина ийир кар амач, - лагьана, жанавурдин хам гьалсна, хеб там галайнихъ фена.
     Жанавурдин хамуна авай хипрез гьава генани михьиди, цавун гъетlер генани экуьди хьиз жезвай. Адан чанда кичl лагьай затl амачир. Тамуз агакьайла хипрез кьулухъай ван атана:
     - Гьей, вун гьибурукай я? 
     Элкъвена килигайла хипрез вичиз хъел кваз килигзавай жанавурар акуна. КичIела адан далудай гьекь авахьна. Вич жанавурдай кьунвайди рикIел хтайла лагьана:
    - Рехъ алатна жуванбурукай къа­къатнава зун.
     - Жери крар я. Аку,  варз акъатнава. Чахъ галаз ша!
     - Гьиниз? - Хеб гъавурда акьунач.
     - Гьикl гьиниз? Вацраз къув ягъаз.
     Хипре вацраз килигна гьарайна:
     - Мэ-э-э…
     Жанавурар ван алаз хъуьрена:
     - Ви хиялрай хипер физвай хьтин­ди я. Са герен ксус, экуьн яралай неда чна абур тухдалди. Мукьув гвай яйлахда чIехи суьруь ава.
     Гьа икI, хеб жанавуррин арада амукьна. «Са вил ахварна арадай акъатда зун», - фикирна ада. Ам цlийиз ахвариз фенвай хьи, садлагьана тфенгдин ванери чил юзурна. «Гъуьрчехъанар я, фад катин», - гьарайна, жанавурар гьарад санихъ катна. Са гуьлле хипрен япун кlаникай алатна. Кьиникьдикай кичlела хеб вичин куьруь кlвачераллаз ничхиррилай фад катзавай. Ял кьунвай жанавурарни хеб тамун агъа кьилив агакьна. Ялгъузвиликай кичlе тир хебни гьабурун гуьгъуьна гьатна. «Я залумар, куьн ксун мус ийизвайди я?» – лугьуз фикирзавай хеб куьлуь камар вегьиз вилик физвай. И арада генг яйлах, къацу векьерни фена адан хиялдай. Ахпа  «Векь недай жанавур жеч гьа-а! Са тlимил эх хъу­вуна кlанда», - лагьана каш рикIелай алудна ада.
     Садлагьана хипрен кlвач ракьара гьатна. Адан гьарайдин ванцел жанавурар вири кlватl хьана. Ничхирри хипрен кlвач са гужуналди ракьарай
акъудна.
     Галатна гьалдай фенвай, гишила руфуни кьуркьурзавай, кьецIи хьанвай хипре хайибурувай къакъат­нава лугьуз вичи-вичиз сеперарзавай. «Жанавур хьун регьят кар туш кьван. Са герен секинвал авачиз, кьуд пад душманар яз уьмуьр гьалун куьз герек я?»
     Хеб пашман хьанвай. Адаз элкъвена яйлахдиз хъфиз кlанзавай, ингье рехъ чизвачир. Жанавуррин фикирдай лагьайтIа, хиперин суьруь акъатзавачир. Абур яйлах галайнихъ фейила, хвеши хьайи хебни ничхиррин гуьгъуьна гьатна. Вичин хизандихъ, хипехъанрихъ, чубанд кицlерин амп ягъунихъ цlигел хьанвай ам.
     Суьруьдив агакьайла хипрез вичинбуруз хабар гуз кlан хьана. Адан «мэ-э-э» авур ванци чубандин кицlер гьасятда ахварай авудна. Абур хиперал вегьенвай жанавуррин гарданрикай галкlана. Ина гьарай-вургьай гьатна. Хипехъанри тфенгар ахъайна.
     «Зун я са жанавурдин сарак акатда, яни тфенгдин гуьлледи рекьида», - фикирна хипре. И чIавуз хипрез хкадарна вичин винел къвезвай чубандин кицl акуна.      Ада фад жанавурдин хам хтIунна лагьана:
     - Я стха, ваз зун чир хьаначни?! Зун я, жуванди.
    - Вуна ина вучзавайди я? Фад экечI суьруьдихъ», - лагьана кицIи хипрез вилер экъисна. Хипре чlуькьни тавуна ада лагьайвал авуна. Им талана хипре кицlин гафуниз икьван рикl алаз амал авурди тушир.
      Хипехъанрин патавай алатдайла хипрез чилел жанавуррин лешер акуна. Хипехъанри абурун хамар алажиз къванерал экIяйзавай.
Вичин кьилел атай кьванбур рикlел хтай хипре фикирна: «Гьахълудаказ лагьанвайди я кьван: «Жанавурдин бахтни кьий, къуьрен тахтни». Жуван хебвал хъсан я!»
 
АЗИЗРИН Севда

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я Гуьмбет хкажда РикIелай тефир мярекат Кпул ятар Виридалайни жегьил алим
Статьи из этой рубрики
Гатфар Жив такур гъед Хъсанвилиз писвал Лекьни пехъ Жуван кIвал
ЦIИЙИ ТИЛИТ
№: 8(324)
сентябрь, 2018

Скачать PDF

РУБРИКИ

ПОЛЕЗНОЕ