Поэзия | 3(297) 2016
Зи хуьруьн тIвар Кчан я
Са хуьр туш ам, валлагь зи рикI, зи чан я,
Лугьун за квез, зи хуьруьн тIвар Кчан я.
Вине СтIур, адлай вине гъуцар чил,
Агъуз ТIигьир, винел ала цифед гьуьл,
Кефер патай ТIигьиржалри гузва гъил,
Вилик Кузун, Лацар лугьур макан я,
И хуьрерин юкьваллай хуьр Кчан я.
Инин вацIар Кьулан вацIун хилер я,
ЦIуру сурар дегь чIаварин гелер я.
Къузад живер рехи хьанвай цIвелер я,
«Куьшуьд», «КIазад», «Гьажид» пелер лишан я,
Дагъдин хурал алай и хуьр Кчан я.
Дегьне кIамар, кьакьан пелер гар галай,
Кьуд пад цуьквер, гьар са тавдин зар галай,
Лирлиярни диге галай, яр галай,
Валлагь дустар, и хуьр зи дин, иман я,
И гуьлуьшан чка гьа чи Кчан я.
Вил вегьейла элкъвез-элкъвез яйлахар,
Земземдилай хъсан къайи булахар,
Квар къуьневаз авуна лап дамахар,
Рушар - гъизвай ятар чандиз дарман я,
Икьван иер таватрин хуьр Кчан я.
И чилерин гьар са куьлуь къванцIиз кьий,
Инай къвезвай гьар са верцIи ванцIиз кьий,
Къацу чуьлдин векьиз, мулдиз, гъванциз кьий,
Гьина хьайтIан рекьиз жуван ватан я,
Женнет чилик галай чка Кчан я.
И чилера мехъерар хьуй, мелер хьуй,
А мехъеррик тIарам лезги кьуьлер хьуй,
Зегьмет чIугдай, гапур кьадай гъилер хьуй,
И цIарарни туькIуьрай кас Алпан я,
ЦIайалпанрин хуьрни гьа чи Кчан я.
Скачать PDF
Комментарии к статье
Будьте первым кто оставит комментарий к статье.Оставить комментарий