Чи тIвар-ван авай, уьмуьр гьална куьзуь хьанвай инсанрин кьилив фин, абурукай хабар кьун, ихтилатарна рикI аладарун «Самур» газетдин редакциядин коллектив паталди адетдиз элкъвенва. Ингье и йикъара чун сейли художник, хайи халкьдални хайи чIалал гзаф рикI алай Магьмуд Челебован кьилив фена. Хырдаланда яшамиш жезвай Магьмуд муаллимдизни адан уьмуьрдин юлдаш Сара ханумдиз чун акурла акьван хвеши хьана хьи… Чина нур, вилера гъамлу хъвер авай Магьмуд муаллим кьегьал женгчиди хьиз уьмуьрдин яцIарай акъатнавай арифдардиз ухшар хьанвай. Адан акьуллу ихтилатрихъ яб акална чна, уьмуьрдин рехъ рикIел хкана. Ахпа камалэгьлидив савкьват яз «Самур» газетдин эхиримжи тилитар, гьакIни «Лезги чIаланни азербайжан чIалан гафарган» вугана. ЧIехи тир къимет гана ада чна и рекье чIугвазвай зегьметдиз.

     Гзаф эсерна чаз и гуьруьшди. Эхь, уьмуьрдихъ жегьилвал хьиз, кьуь­зуь­вални ава… Ингье Магьмуд муаллим хьтин инсанар ихьтин береда кьил рехи дагълар хьиз аквада. МасакIа хьунни мумкин туш. Вучиз лагьайтIа жегьил чIавуз ихьтин инсанри чпин уьмуьр хайи халкь патал, адан тIвар, чIал, меденият хуьн патал серфда.

     ТIвар-ван авай художник Челебов Магьмуд Жамидин хва 1935-йисуз КцIар райондин ГуьндуьзкIеле хуьре ди­дедиз хьана. Хуьруьн мектеб, гуь­­гъуьнлай Бакудин 3-нумрадин учи­лище акьалтIарай, Бакудин нафтIадин мяденра кIвалахиз эгечIай Магьмуд Челебов 1956-йисуз Бакудин А.Азим­задедин тIва­­рунихъ галай ху­до­жественный учи­лищедик экечIна. 

     1965-йисуз М.Челебов Азербай­жан­­­­­дин М.А.Алиеван тIварунихъ га­­­лай Харусенятдин Институтдиз гьахь­на. 1981-йисалай СССР-дин Художникрин Союздик квай М.Челебова чи республикадин, Советрин Союздин, къецепатан уьл­квейрин цIудралди выставкайра иш­тиракна.

     Лезгийрин сейли шаир СтIал Су­лей­манан, машгьур къагьриман Гьа­жи Давудан, 121 йис яшамиш хьа­йи халичадин устIар Зибейда Шейдаевадин портретар художникдин къиметлу эсерар я. Магьмуд Челебов лезги халичайринни сумагрин чешнеяр дериндай чидай ва гьа чешнейрик вичин пай кутунвай художникни я. «Жами Нур», «Инжи», «Гатфар», «Дуьнья», «Лезгинка» хьтин сумагри ва халичайри Азербай­жандин музейрин экспо­натрин арада лайихлу чка кьазва. Сенят­карди чи клас­сикрин шикилар чIугунвай «Лезги халкьдин чIавар­ган» арадал гъана. Азербай­жанда лезги чIалал чап хьайи цIудралди ктабриз шикилар чIугуна.

М.Челебова шиирар ва прозадин эсерарни кхьизва. 2001-йисуз Бакуда адан азербайжан чIалал лезги эпос­дин къагьриман Шарвилидиз та­лукьарнавай «Шарвили» дастан-поэма чапдай акъатна.

     Магьмуд муаллимдин кIваляй акъатдайла чун кеврек хьанвай. Рехъди Адан шикил вилерикай карагиз фикирзавай чна: «Гьикьван хвеши хьанатIа адаз. Ихьтин ксарал кьил чIугун суваб я…»