Россиядин Ярославль ше­гьерда лезги медениятдин меркез кардик кваз 10 йис я. ЯРЛНКА хьиз сейли тир адан хуш суракьар Азер­бай­жан­дизни, Да­гъус­тандизни чкIан­ва. Чеб  Азер­­­­бай­жан­дайни   Да­гъус­тандай тир чи ватанэгьлийри къуьн-къуьне туна санал арадиз гъа­йи  и меркезди ватандай яргъариз акъатнавай лезгияр сад-садав агудун, дидед чIал хуьн, чи халкьдин адетар вилик тухун патал лугьуз тежедай хьтин алахъунар ийизва. Лувар кутазва чахъ абурун агалкьунри. 

     Агъзурдалай гзаф чи ватанэгьлияр яшамиш жезвай Ярославль шегьерда лезгийрин медениятдин меркез 2005-йисуз арадал гъана. Адаз Беглер Сердеран хва Эмирова регьбервал гана. Сад лагьай йикъа­лай вичин вилик урусрин кьула яшамиш жезвай лезгийрин ри­кIелай дидед чIал алат тавун патал галайвал авун хьтин кьетIен везифа эцигай меркезди гзаф къени крарихъ ялна. Хийир-шийирда санал хьун, халкьдин адетар хуьн паталди къуватар галкIурна. 2009-йисуз меркездин регьбервиле Ва­сиф Абдулбеган хва Гьасанов хкяна. Москвадин Гьукуматдин  Эко­но­микадин Уни­верситет акьал­тIарай, хъсан карчи хьиз сейли тир адахъ тешкилатчивилин ала­кьу­нарни авайди винел акъатна. И кар себеб яз эхиримжи йисара Ярос­лавлдин лезгийрин медени уьмуьр­да кьетIен вакъиаяр кьиле физва. Абурухъ чпин футболдин команда, кьуьлерунин студия ава. Мер­кездин куьмекдалди Ярос­ловлда кьуршахар кьунин федерация кардик кутунва. Адан президентни, вице-президентни лезги я.

     Чун шадарзавай крарикай садни ам я хьи, Ярос­лавлдин чкадин тешкилатрин ва агьалийрин патай ЯРЛНКА-диз чIехи гьуьрмет ава. Эхиримжи 6 йисуз Васиф Гьасанован кьиле аваз  и меркезди кьилиз акъудзавай крари акваз-акваз къени цIирер гузва. Ви­чихъ дерин са­вад, ге­гьенш дуьнья­­кьатIунар авайвиляй Васиф вилаятдин агьалийри депутатвиле хкянава. 

     Алай йисан 27-ноябрдиз  Ярос­­лавль  шегьерда ЯРЛНКА-дин 10 йи­­сан юбилей гегьеншдиз къейдна. Ина кьиле фейи шадвилин мярекатдиз зазни эвер ганвай. Яргъарай ван хьунни жуван вилералди акун сад туш. Авайвал лагьайтIа, Ярославлда хьана­чир­тIа, заз чи ватанэгьлийрин къени крарикай са акьванни чирвал жедачир. А.М. Добрынинан тIва­ру­нихъ галай, 850 кас кьазвай медениятдин дарамат сиве-сивди ацIан­вай. Мярекат сересдиз, тешкиллувилелди тухун патал жегьил ре­жис­серди, вичихъ чIехи алакьу­нар авай лезги руш Кристина Абуку­ловади гзаф зегьметар чIу­гунвай.

     Васиф Гьасанов сегьнедиз экъе­чIайла залди адаз гурлу капар ягъа­на. Инсанри и къени къилихрин, рикI ахъа касдиз чпин ма­йилвал гьа икI къалурна. Мер­кезди кьиле тухвай кра­рикай куьрелди рахай ада гаф манийризни кьуьлериз гана. Лез­ги адетрин бинедаллаз, лез­ги руьгь кваз туькIуьр­навай концертдин программа рикI ахъайдайди хьана. 

    Чка атунивай мугьманрини чпин ри­кIин гафар лагьана. Ярос­­­лавль вилаятдин гьукуматдин седридин заместитель Александр Нечаева, Ярославль ше­гьер­дин мэрдин заместитель Игорь Бло­хина, ФЛНКА-дин президент Ариф Кери­мова, Азия, Кавказ ва Ура­ло-Повол­жье  Чирунин Мер­кез­­дин кьил Алик­бер Алик­берова, Вла­димир вилаятдин кьуршахар кьунин федерациядин вице-президент Шагь­­­лар Исаева, Ярославль вилаятдин Рос­сия­дин Халкьарин Ассамблеядин (ЯРО) кьил Нур-Эл Хасиева, Бакуда акъатзавай «Са­мур» газетдин редактор Седакъет Кери­мовади ва масабуру  ЯРЛНКА барка авуна.

РикI ахъайдай кар ам тир хьи, юбилейдиз Ярославлдин цIуд­ралди халкьарин, ичтимаи ва диндин тешкилатрин векиларни атанвай. Дуст­вилин, стхавилин гьавади рикIер хъуьтуьларзавай. 

     Лезги рушари чкадин чеченринни ингушрин диаспорадин «Вай­нах» ансамблдихъ галаз санал ла­гьай «Перизада» мани виридан рикIяй хьа­на. Степан Виш­нев­скийдин хал­кь­­­дин оркестрди чи сейли сеняткар Ме­гьамед Гьуь­сейнован «Лезги рапсодия» та­ма­марун лезгийрин харусенятдиз гьуьр­­метдин чIехи лишан тир.

     Концертдиз атайбур Русана Гьа­са­новадин викIегьвилел мягьтел хьана. Иллаки ада кьуьлериз-кьуьлериз лагьай манияр виридаз бегенмиш хьана. Жегьил хоре­ограф Нариман Тагьирова регьбервал гузвай «Дагъ­ларин авазар» кьуьлерин ансамблдин гьар са нумра залди гурлу капар ягъуналди кьабулна. Кьилди и няни патал Бакудай «Сувар» ансамблдин со­листар Жавагьир Аб­дулова ва  Жемила За­лова, гьакI­ни Магьач­къаладай Жаклина ва Ме­гьамед Алекперов атанвай. Абу­рун ма­нийри залда авайбуруз хуш легьзеяр бахшна. 

     Нянидилай гуьгъуьниз мугьманар  лезги ди­шегь­лийри чранвай мил­ли тIуьнар алай суфрадихъ ацукьна. Ина хьайи ихтилатар акьван верцIибур тир хьи, садазни кIва­лиз хъфиз кIан­завачир. Чара-чара халкьарин ве­килри чпин халкьарин чIаларал ма­нияр лу­гьуни межлисдин кфетлувал артухарна. 

Ин­гье рикIел аламукьдай легь­зейрикай сад «Сува­рин» маничияр Жавагьи­рани Жеми­ла­ди гайи устадвилин тарсар хьана. Жанлу­даказ, микрофон галачиз манийрал илигай абурун ванерин кьакьанвилелни иервилел вири гьейран хьана.

     Ярославлда чун са лезги хи­зан­дихъ га­лаз мукьувай та­ниш хьана. Урусрин кьула яша­мишзаватIани, лезги къилихарни адетар хуьзвай, жу­ван­бурухъ ялзавай, чпин кьве хцизни кьегьалвилин, касвилин тарсар гузвай Балаке­рим ва Ин­дира Мегьамедоври и шегьер чаз генани гзаф кIанарна. Чун чпин кIвале кьабулна рекье тур и кьве иер ва къени инсандин зарафатар квай верцIи ихтилатар, лезги поэзиядални манийрал рикI алай абурун акьул­­лу рахунар чи рикIелай алатдач. «Аваз хьурай куьн виринра, чан жуванбур», лагьана чара хьана чун абурувай.