Алай йисан 4-декабрдиз Каспи гьуьлелай къарагъай гужлу чайгъунди ина нафтIадин  мяденрал кIвалахзавай ксарин кьилел акьал­тIай пис мусибат гъана. Гарун зарбвал са тIимил гагьда 38-40 метрдив агакьайла гьуьле авай «Гуь­нешли» мядендин цIуд лагьай платформада газдин хел кьатI хьана. 27 сятдин вахтунда давам хьайи чайгъунди хел гуьнгуьна кутадай мумкинвал ганач. Гьа са вахтунда гуьлуьн лепейрин кьакьанвал 8-10 метрдив агакьзавай. Садлагьана алукьай залан гьалар сакIани арадай акъуддай мумкинвал хьанач ва газди цIай кьуна.

     Плптформади цIай кьурла ина 63 кас авай. Абурукай 33 кас баладикай хкудиз хьана. Амайбур цин кIаниз ягъана. Абур хкудун патал вири жуьредин алахъунар авуна. КIамай кьван гимияр, вертолётар, маса техника кардик кутуна. Йикъаралди кьиле фейи жагъурунар себеб яз 6 касдин мейитар гъилик авуна.

Гьуьле телеф хьайибурун арада са шумуд халкьдин векилар, гьабурукай яз Къуба, КцIар ва Хачмаз районрай тир азербайжанвияр ва лезгиярни ава. Халкьдин кьилел атай и мусибатдихъ авсиятда Азер­байжан Рес­пуб­ликадин Пре­зи­дент Илгьам Алиева кьилди серенжем кьабулна. Гьа серенжемдив кьадайвал, 6-декабрь Азер­байжанда яс­дин югъ яз малумарна.

     Гьуьле квахьайбурун хи­занрин дердиниз республикадин вири агьалияр шерик хьана. Азербайжан Республикадин Ми­нистр­рин Каби­нетдин кьил Артур Расизадеди «Гуь­нешлидин» мусибатдихъ галаз ала­кьалу яз кьилди серенжем кьабулна. И серенжемдив кьадайвал, телеф хьайибурун ва  квахьнавайбурун хи­зан­рин гьарадаз са сефердин 15000 манатдан куьмекар гана.

     Идалай гъейри гьукуматди «Гуь­нешлида» нафт акъудзавай вахтунда чпихъ зарар хкIур инсанрин ва «Нефт дашларыда» квахьай 3 касдин хизанриз баладик хьайи зарар вахкун хиве кьуна. Гьа са вахтунда Гьукуматдин Комиссияди маса теклифарни гьазурнава.

     Декабрдин сифте йикъара Каспи гьуьле чи инсанрин кьилел атай мусибат халкьди садрани рикIелай алуддач. Абур чIехи баладихъ галаз женг чIугур кьегьалар хьиз гьамиша рикIел хкида.