Лезгияр вирина  |  10(245) 2011      

Диана Юзбегова. Интернетдай жагъай зи цIийи таниш. Москвада яшамиш жезвай и лезги руша зи суалриз хайи чIалал жавабар гузвай.  Дианади Москвада МУЗ-ТВ каналда журналист яз кIвалахиз саки 3 йис жезва. Ада “PRO-новости”, “PRO-обзор” ва “Популярная правда” передачаяр кьиле тухузва. Россиядин ва къецепатан уьлквейрин шоубизнесдани кIвалахзава. 22 йис тамам хьанвай лезги рушахъ кIвалахдин жигьетдай ихьтин еке агалкьунар хьуни зун кьадарсуз шадарна.
Диана Кцlар райондин Пирал хуьряй я. Ам 1989-йисуз Одинцово шегьерда Россиядин МЧС-дин генерал Насир Юзбегован хизанда куькIвей сифте гъед я. Шегьердин 10-нумрадин лицей акьалтIарай ам Россиядин халкьарин дуствилин университетдик  экечIна. Алай вахтунда ам 6-курсунин студентка я. Агъадихъ заз кIелзавайбурун фикирдиз адахъ галаз хьайи суьгьбет теклифиз кIанзава.

- Диана, къенин юкъуз вун неинки Россияда, гьакIни къецепатан гзаф уьлквейра машгьур хьанва. Жуван миллетдин векил икьван жегьил яз ихьтин дережайрив агакьун дамахдай кар я. Заз вуна лицейда кIелай йисарикайни, вун телевиденидиз атуникай суьгьбет авунайтIа хъсан жедай.
- Лицейда кIелзавайла, зун пара къал гвай руш тир. Авайвал лагьайтIа, къени зун гьахьтинди яз ама. Амма за хъсандиз кIелзавайвиляй муаллимри заз жува-жув тухунин тегьер багъишдай. Гьеле и йисарилай башламишна захъ гележегда чIехи сегьнеда халкьдиз жуван алакьунар сейли ийидай фикир авай. Университетдик экечIайла, за вуздин общественный уьмуьрда мукьувай иштиракзавай. Зи зиреквал, бажарагъ кьатIунай бязи танишри заз телевиденида кIвалахун теклифнай. Ингье къе за аял чIавалай захъ авай мурад кьилиз акъудна.
- Телевиденида кIвалахун четин яни?
- Авайвал лагьайтIа, эхь. Хейлин вахтара гьатта йифен ахварни хана кIвалахуниз мажбур жезва. Жуьреба-жуьре шегьерриз, уьлквейриз командировкаяр тайинарайлани рекьера четинвилер тIимил ацалтзавач. Жува тухузвай передачаяр за геждалди рикIел аламукьдайбур ийиз алахъзава. Абур кьетIенбур хьун патал гзаф зегьметни чIугуна кIанзава. Гзаф танишри заз передачайрилай гуьгъуьниз зенгер ийиз мубаракар ийизва.
- Маса кIвалахрал машгъул жезвани? Азад вахт гьикI акъудзава?
- Азад вахт захъ гьич жезвач лагьайтIа, куьн чIалахъ тахьун мумкин я. Амма гьакъикъат гьа ихьтинди я. Маса кIвалахрал машгъул жедай мумкинвал захъ гьелелиг авач, университетда кIелуни и кардиз манийвалзава. Къведай йисуз диплом вахчурла заз радиодани кIвалахиз кIанзава. И рекьяй захъ тежрибани хьанва, шоубизнесдин хейлин сирерни заз таниш я. Бязи вахтара за урусдал шиирарни кхьизва.
- Заз малум тирвал, вуна лезгийри Москвада тешкилзавай “Яран суварин” концерт са шумудра кьиле тухвана. Медениятдин и мярекатдикай ви фикирар.
- Зун а концертриз гьар йисуз физва. Россиядин меркезда яшамиш жезвай дагъустанвийриз и шадвал себеб яз йиса садра санал кIватI жедай, хайи халкьдин манийрихъ яб акалдай, чи рикI алай манидарар аквадай мумкинвал жезва. Кьве сеферда за ам кьилени тухвана, садра текдиз, садра Юсуп Мегьамедовахъ галаз санал. И кIвалах заз кьадарсуз бегенмишни хьана.
- Гележегдин фикирар гьихьтинбур я?
- Тежрибалу ва пешекар теле-журналист хьун зи мурад я. И кIвалахдилай гъейри, заз жува чирвилер къачузвай пешедай яшайишдин месэлайрални машгъул жез кIанзава. И карда зун паталди Тина Канделаки чешне я. Зи фикирдалди, ам гзаф акьуллу ва вири патарихъай алакьунар авай дишегьли я. Актриса язни заз жуваз жув ахтармишиз кIанзава. Зи танишар тир хейлин артистри заз гьамиша лугьузва: “Диана, вун кинода къугъвана кIанда, гьикI хьи, ви акунар адетдинбур туш”. Килигин, Аллагьди гайивал жеда.
- Къуй ви вири мурадар кьилиз акъатрай. Вахъ кIвалахдани еке агалкьунар хьун чи мурад я.

Мегьамед ИБРАГЬИМОВ