Булахда яд ава
Поэзия  |  6(289) 2015      
      Алай йисан мартдин вацра Москвада кьиле фейи лезгийрин  Яран сувариз талукьарнавай концерт са кьадар  тафаватлуди хьанай. Концерт рикIиз чими, жегьил са гадади лезги чIалалди тухузвай. Ада сегьнедив акI кьазвай хьи, на лугьуди, шумудни са йисара ихьтин мярекатрин кьиле хьанвайди я. Арада вичин шиирарни кIелзавай и гада гзафбурун рикIе ацукьнай. Вичихъ шаирвилин алакьунар, гьакIни шиир фасагьатвилелди кIелдай бажарагъ авай  и гадади - Владик Батманова вичин сифте ктаб пишкеш яз ракъурайла чаз гзафни-гзаф хвеши хьанай. Ингье ктабдиз акъуднавай шиирар мад гъилера газетда чап тавун патал адавай редакциядиз вичин цIийи шиирар ракъурун тIалабнай чна. РикIе илгьам, гъиле къелем, чанда цIай, руьгьда лезгивал авай и жегьилдин шиирри фикиррин къенивилелди чи фикир желбнай, «и булахда яд ава» лагьана фикирнай чна.
      I995-йисуз Мегьарамдхуьруьн райондин Хуьрелрин хуьре дидедиз хьайи Батманов Владик Нафиран хци ина юкьван мектеб акьалтIарнава. Алай вахтунда Дагъустандин Гьукуматдин Универ­си­тетдин Дагъустандин филологиядин факультетда кIелзава. 2012-йисуз адан "Билбил" тIвар алай ктаб басма хьанва. Чна жегьил шаирдиз мадни чIехи агалкьунар тIалабзава!
 
Ви мехъерик
 
Тухудайла, кIаниди вун,
Мехъерикай хкудмир зун.
Тавуна гьич кагьулвилер,
Аквада за гьазурвилер. 
 
Хьурай лугьуз иер кьиса,
Ваз вишни са цуьк гъида за.
Вилер шехьиз, п1узар хъуьрез,
Къведа руш зун ви шад мелез. 
 
Ви чамраз хъел атайт1ани,
Ада ви рехъ ат1айтIани,
Рик1е аваз гъамни суза,
Ваз кьуьл ийиз эверда за.
 
Чун кьвед санал акур чIавуз,
Кьуьл ийиз кам къачур чIавуз,
Гьейран хьана мугьманар чал,
Шумудалай алахьда звал:
 
"Ибур кьведни кьадайбур тир,
Сифте ширин рахайбур тир".
Агь, килигда пашмандиз чаз.
И кар залан жедачни ваз?
 
Вилин накъвар тежез илив,
Вун хъфида чамран кьилив.
Мад вуч ийин, сагъ хьурай вун,
Жуван чамраз рагъ хьурай вун.
 
Азиз дагълар
 
Азиз дагълар, ваз акунай виш тIалар, 
Дявед чIавуз чи дидейри эх авур. 
Азиз дагълар, ваз акунай аялар, 
Вичин хайи бубадин пак чин такур. 
 
Ваз килигиз, ишез шумуд етимди 
КIуь накъварин селлер гъанай вилерай.
Вун рикlеваз шумудни са итимди, 
Женгера тур вегьеначир гъилерай. 
 
Азиз дагълар, вун паталди дяведиз
Агъзурралди  фена жегьил лезгияр. 
Чи уьлкве гьич кьун тавурай завалди,
Таквадайвал чаз экъичай ивияр. 
 
Азиз дагълар, хва фидай югъ дяведиз 
Мад садрани чи дидейриз такурай! 
Дяве кlани инсандин рикl, я Аллагь,
Ам дидедин руфунамаз пад хьурай. 
 
Ви кьакьанвал, ви такабур акурла, 
Аял вахтар хкведа хьи рикlел зи.
Лугьуда за даим дуьа авурла: 
Етим аял тахьурай гьич чилел чи!
 
Дегиш хьанва
 
Папа хьрак фу чразмач, 
Эвелан хьиз гам хразмач, 
Кьеб  эч1ягъдай свас аквазмач, 
Дегиш хьанва дуьнья михьиз,
Адан крар женни эхиз?
 
Къе ришветрихъ авач кьадар, 
Пул гвачирдаз дуьнья я дар,
Фасикьрини ийиз куп1ар, 
Дегиш хьанва дуьнья михьиз,
Адан крар женни эхиз?
 
Катзава эл к1валахдикай,  
Дуст кьунава ялтахдикай, 
"Фекьи" хьанва алчахдикай, 
Дегиш хьанва дуьнья михьиз, 
Адан крар женни эхиз?
 
Лап "акьуллу" хьанва жегьил, 
Залан кардал  вегьизмач гъил,
Маса гузва гъилевай чил, 
Дегиш хьанва дуьнья михьиз, 
Адан крар женни эхиз?
 
Садбуру къар акъудиз хъваз, 
Садбур ава кьатIар ч1угваз, 
Акъваз женни и кар акваз?
Дегиш хьанва дуьнья михьиз, 
Адан крар женни эхиз?
 
Владик, вун санал акъваз, 
Фагьум ая жува-жуваз,
Вуч хьанват1а чизвачни ваз? 
Дегиш хьанва дуьнья михьиз, 
Адан крар жезмач эхиз.
 

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
«Сувар»у скоро 20 лет Вири дуьньядиз сейли хьана Къебелевийри «Самур» кхьизва Festivalda ləzgi musiqi səsləndi Чирвилер чукIурай кьегьал
Статьи из этой рубрики
Женгера фейи уьмуьр СтIал Сулейманаз гуьмбет хкажна Лезги чIал кIанарзава Са маса тIям ава Ватандин чилихъ “Квахьай йикъарган” кIелайла...
ЦIИЙИ ТИЛИТ
№: 8(353)
декабрь, 2021

Скачать PDF

РУБРИКИ
Tarixin izi ilə
Gəncliyimiz – qürurumuz
Чи къагьриманар
Yubiley
Люди и судьбы
Шаирар
"Самур" - 30
Редакциядин дустар
Яран сувар
Qarabağ müharibəsi
Diqqət: İnsan taleyi!
İnam və iman
"Soyuq günəş"
ЦIийи фильм
Dünya xalqları
Чи тарих
Тарих авайвал
Müsahibə
Спасём планету
Dünya ləzgiləri
Дагъустан
Диктант
Чи кьегьалар
Редактордин гаф
Чи классикар
"Самур" - 20
Мах
ЦIийи ктабар
Жеч гьа!..
Dağıstan xalqları
И чил хайи диге я
Добрые вести
Milli Məclisə məktub
Новости Россотрудничества
Известные лезгины
Марагълу инсанар
Redaksiyaya məktub
Языки мира
Лезги чIалан месэлаяр
Квез чидани?
Известные лезгиноведы
Лезгияр вирина
Юбилей
SOS!!!
С верой в душе
"Самурдин мектеб"
Мораль
Чи адетар
Məşhur ləzgilər
Новости на все голоса
Чи хуьрер
Хъсан хабарар
Известные кавказоведы
Чи адетар
Yeniliklər
Чешне къачу!
Чакай кхьенай ...
Алимрин веревирдер
Çıxışlarımızın əks-sədası
Барка
Эпитафия
Ша, лезги чIалал рахан!
Хабарар
Тарихдин геле аваз
Поэзия
Харусенят
Этнография
Дагестан
Народы мира
Спорт
Инсанар, кьисметар
Редакциядиз чар
Чир-течир
Yeni kitablar
Фольклор
Чи сейлибур
Дайджест
Чи тавдин кIвал

ПОЛЕЗНОЕ