Елабугадин дамах
Лезгияр вирина  |  1(284) 2015      
     Пуд йис инлай вилик Татарстан Республикада хьайи зун Елабуга шегьердизни илифнай. Зун аниз дуьшуьшдай фейиди тушир. Сад лагьайди, урусрин зурба шаир Марина Цветаевадин уьмуьрдин эхиримжи йикъар фейи кIвал акваз, адан гелерихъ къекъвез кIанзавай заз. Кьвед лагьайди, чи ватанэгьли Вакъиф Саркаровахъ галаз таниш жедай ният авай чахъ. Адаз и республикада авай чIехи гьуьрметдин суракьар чавни агакьнавай. 
     Гагь-гагь четин яз аквадай крар Аллагьди акьван регьятвилелди кьилиз акъудда хьи. Набережны Челны шегьерда жуван ватанэгьлийрин мугьман хьайи зи кьилел акьулдиз текъведай са кар атанай. Вакъиф муаллимдин уьмуьрдин юлдаш, тIвар-ван авай муаллим Фатима Саркаровади заз зенг авунай ва завай Елабугадиз атун тIалабнай. «Елабуга такурдаз Татарстан акунвачирдай я», - лагьанай ада.
     Набережны Челны шегьерда кIелдайбурухъ галаз кьиле фейи зи гуьруьшдиз Фатима ханумни атанай. Ам кьакьан буйдин, иер, халисан дагъви дишегьли тир. Лезги чIалал гзаф фасагьатлудиз рахазвай ада поэзиядин межлисдал авур рахунри вири гьейранарнай. 
     Муькуь юкъуз чун адахъ галаз санал Елабугадиз рекье гьатнай. Фатима Саркаровади вичин кIвале мугьманпересвилелди кьабулнай зун. Ингье, Вакъиф муаллим акун кьисмет хьанач заз. Ам тадиз Казан шегьердиз рекье гьатнавай. ЯтIани Вакъиф Саркарован рикI алай Елабугадин Медениятдинни Харусенятдин Училищеда  хьанай чун . Ина  Саркароврин хизандай кьуд касди – Вакъифа, адан уьмуьрдин юлдаш Фатимади, руша Зулейхади ва езнеди Икрама кIвалахзава. Фатима психолог я. Зулейхади  училищедин директордин заместителвиле кIвалахзава. Адан гъуьл Икрам Амирбегов муаллим я. Дагъустандин Миграгъ райондай тир и лезгияр виридаз пара кIанда.
      «Кама» театрда хьайи чна В.саркарован  кIвалахдин юлдашрихъ галаз ихтилатар авунай.  Татарстанда харусенятдал рикI алайбуруз и кьегьал лезги хъсандиз чида. Садбуру авайвал хиве кьуна: «Чаз лезгияр кIанарайди Вакъиф Абдул­ла­евич я». Адан ала­кьунрикай, ацукьун-къарагъуникай инсанар акьван рикI алаз раханай хьи! Ва­тан­эгь­лий­ри адаз «Ела­бугадин дамах» лугьуда.  «И инсан кьиляй-кьилди сувар я», «Ам феномен я», «иер инсан я» хьтин гафар ван атана заз адакай. 
    2013-йисуз, вичин 70-йисан юбилей къейд ийидай чIавуз  ада регьбервал гайи «Кама» театрдиз и касдин тIвар ганай ва и кар вирибурун рикIяй хьана. 
Эхь, Елабугадин медениятдин училищедин тIвар-ван авай педагог ва режиссер Вакъиф Саркарова 45 йис я инсанриз хуш легьзеяр бахш ийиз. 45 йисуз ара датIана вичи арадиз гъайи «Кама» халкьдин театрдин режиссерни, актерни тир  и касдин виридалайни чIехи кьетIенвал инсанрин къадир чир хьун я. Гзаф йисар я и коллектив республикадин, РФ-дин, гьакIни дуьньядин фестивалринни конкурсрин лауреат жез. Алатай йисуз РФ-дин президентдин указдалди В. Саркароваз «РФ-дин лайихлу медениятдин кIвалахдар» тIвар гана. Елабугадин  Вакъиф Саркарован тIвар алай  «Кама» халкьдин театрдин режиссердиз, чи ватанэгьлидиз гайи и гьуьрметдин тIварцIи ам чидай вирибурухъ хьиз чахъни лувар кутуна.
 
 

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
и чил хайи диге я РикIелай ракъурдач Решадан шегьре рехъ “Квахьай йикъарган” кIелайла... Кьилди ктабхана
Статьи из этой рубрики
Музей кардик кухтуна Наида вилик акатна Гран при къачуна Ктабдиз икрамна Парижда са тават ава...
ЦIИЙИ ТИЛИТ
№: 7(312)
август, 2017

Скачать PDF

РУБРИКИ

ПОЛЕЗНОЕ