Ашукь Алескер рикIе аваз
Чешне къачу!  |  12(283) 2014      
     Хъсандиз лагьанва бубайри: «Шаирар дидейри хада, халкьди хуьда». Халкьди хуьзвайвиляй абурун тIварарни теснифар виш йисарин яцIарай акъатиз шумудни са несилрал агакьда. Са гафни авачиз, шаиррин, ашукьрин ирс хуьзвай, абуруз икрам ийизвай, абур кIанарзавай ксар халисан кьегьалар я. Ихьтин кьегьалри хайи чIалан, хайи эдебиятдин таъсиб чIугваз, вири гьейранардай аламатдин крар кьилиз акъудда. Гьа икI, гьар садав фикир-фагьумиз тадай са месэладикай лугьуз кIанзава заз.
     Бакудин Нариманов районда яшамиш жезвай, асулдай Гуьйче магьалдай тир Гьуьсейн Гьасанова вичин кIвале Азербайжандин машгьур чIалан устад ашукь Алескеран музей туькIуьрнава. Вад утагъдикай кьуд музейдин ихтиярда вуганвай, вичин 87 йис хьанвай и агъсакъалди ина гьикьван марагълу экспонатар кIватIнава. Гь.Гьасанова лугьузвайвал, Гуьйче магьалда дуьньядиз атана вири Къафкъаздиз сейли хьайи ашукь Алескер адан чIехи бубадихъ ва бубадихъ галаз дуст тир.
     «Зи рикIел хъсандиз алама, - лугьузва Гьуьсейн халуди, - ашукь Алескер са шумудра чаз мугьман хьанай. Адан чIалар, адан чуьнгуьрдин ван исятдани зи япара ама. А чIавуз жув аял яз ашукьдин чIаларин деринвал бегьемдиз къатIуз жедачир завай, анжах адан ванци гьар гъилера суьгьуьрда твадай зун. Ашукьди вичин дуьнья дегишарайла чи хуьруьнбур вири адан тазиятдиз фенай. Зун лагьайтIа, акьван шехьнай хьи… Заз ашукь гьамиша жанлу яз акваз кIандай. АлакьнайтIа, адан тимтал эцигдай за жуван гъилералди. Ингье я залай и кар алакьнач, яни бегьем кIелиз хьанач. Шофервилив эгечIна 56 йисуз «КрАЗ», «КамАЗ» машинар гьална за. Амма ашукь Алескерни рикIелай ракъурнач. Гьиниз фейитIа, адакай делилар кIватIна. ЧIехи устаддин музей арадал гъиз кIанзавай заз. Эхирни Аллагьди мураддив агакьарна зун.»
     Гьуьсейн халуди лугьуз тежедай кьван кIанивилелди арадал гъанвай музей акурла гьар са кас пагь атIана амукьда. Ина 3000 экспонат кIватIнава. Абурун арада 1500 ашукьдин шикилар, 900 вал, ашукьрин 500 ктаб, чуьнгуьрар, 4 граммофон, 3 патефон, лентер, кассетарни ава. Ашукь Алескеран чуьнгуьр, адан хром чекмеяр, юкьва кутIундай чIул иллаки чIехи мас авай экспонатар я. Садра и музейдиз килигиз атай Франциядин чи уьлкведа хьайи посол Паскал Муьнйедин уьмуьрдин юлдаш Калинади лагьанай: «Зун паталди Франциядин 1 миллиард доллардин мас авай музейдилай и музей генани марагълу я. Вучиз лагьайтIа ам са сая касди, ашукь Алескеран яратмишунриз авай вичин чIехи муьгьуьббатдалди арадал гъанва.»
     Са гафни авачиз, ихьтин къиметлу музей 4 утагъда гьакьарун четин я. Гьавиляй ам гегьенш чкадиз акъудун патал Гь.Гьасановаз Медениятдинни Туризмдин Министерстводивай куьмек кIан хьанва. Талукь идарадин кьиле авайбуру куьмекда лагьана гаф ганва. Бакудин музейдин меркезда Ашукь Алескеран музей патал 100 квадратметрдин чка чара авун къарардиз къачунва. Гьа югъ вичиз вилералди акваз кIандай лугьузва Гьуьсейн халуди. 10 веледдин, 40 хтулдинни птулдин, са гафуналди, 50 кас авай чIехи хизандин кьил тир адаз халисан къагьриман лугьуз жеда. Чпихъ гьар жуьредин мумкинвилер авай, шумуд чкадал кIвалер, чIехи дараматар эцигна ичIиз тунвай ксари Гь.Гьсановалай чешне къачуртIа хъсан я. Вучиз лагьайтIа и дуьньяда амукьдайди жуван халкь патал авур хъсан крарни хъсан тIвар я.
 

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я «Сувар» вновь поразил зрителей Жуввал гьикI хуьда? Къурушвийрин мисалар Дуьньядин мектебра
Статьи из этой рубрики
Къебелевийри «Самур» кхьизва Жегьил алимдин агалкьунар Кьегьал Жуван халкьдиз вафалу жен Дидедин фу
ЦIИЙИ ТИЛИТ

РУБРИКИ

ПОЛЕЗНОЕ