Жемиладин ван
Харусенят  |  9(280) 2014      
   Квез гатфарин чарчаррин ван хьайиди яни? Дагъларин цIранвай живерикай кIватI хьана чархарал гьалч жезвай мурк хьтин къайи ятарин мелодиядихъ яб акалайди яни куьне? Гьа чарчаррин ванцив гекъигиз жеда Жемиладин ван. Шадвилинни такабурдин хару гьиссер кужумнавай кьакьан, иер ван. Жемила чидай, манийрай кьил акъуддай вирибуру лугьузвайвал, адахъ дагъвийриз хас гужлу, милли калоритдив диганвай халисан лезги ван ава.
Зи рикIел хъсандиз алама. Са шумуд йис идалай вилик са руша чи кIвализ зенг авунай:
    - Зун Жемила Залова я. Зун КцIарай куьн лагьана атанвайди я. «Сувар» ан­самбл­диз кьабулдани куьне зун?
    ЧIугуна лагьай и гафарикай сивик хъвер акатай за жузунай:
    - Вахъ ван авани?
    - Ава.
   - Гьихьтин ван я?
    - Вижевай.
    - Са мани лагь кван.
    Зи сивяй и гафар акъатунни ада манидал илигун сад хьанай.  Жув гьейран хьанвайвиляй кIвалевайбурузни адан ван хьурай лугьуз селектордал илиснай за. Са гафни авачиз, виридаз сад хьиз бегенмиш хьанай чаз адан ван.
    Муькуь юкъуз ам чи кIвализ илифнай: зи вилик кьакьан буйдин, зериф, иер са руш акъвазнавай. Маничидин акунарни вичин ван хьиз иерди хьайила, адав вуж къведа? -лагьана фикирнай за. Адахъ галаз азим ихтилатарнай за. Вич КцIар райондин Чпир хуьряй тирди, урус чIалан муаллим Фехреддин Залован руш, са вахтунда райондин тIвар-ван авай агъсакъал хьиз вичин 
уьмуьрдин рехъ инсанриз чешне хьайи Зал Залован хтул тирди малумарнай ада.
   - Вучиз вуна «Сувар» хкянава? –лагьана хабар кьунай за рушавай.
   - Куь репертуар заз пара кьван бегенмиш я. «Сувар» ансамблдихъ кьетIен рехъ авайди заз хъсандиз чида. Куьне заз кьилди манияр кхьенайтIа, за абур рикIивай лугьудай.
    Зегьметдал рикI алайди, мураддив агакьун паталди женг чIугуна кIанзавайди тийижиз тушир Жемиладиз. Ада сад лагьай йикъалай ансамблдиз цIийи гьава гъанай. «Къведа жал?» манидалди сифте яз сегьнедиз экъечIай руша вичин ванцелди вири гьейранарнай. Бакудин виридалайни чIехи сегьнейрал вичин ала­кьунар къалурай лезги руша  2004-йисуз Москвадин Миллетрин  КIвале кьиле фейи зи яратмишунрин нянидиз лугьуз тежер са иервал бахшнай. Гьар са манидилай гуь­гъуьниз москвавийри адаз гурлуз капар ягъанай.
     Гуьгъуьнлай ам «Суварин» кьуд маничидихъ галаз санал Москвадин Кремлдин имаратда лезгийрин Яран сувариз талукьарнавай концертдик экечIнай. А концертди «Сувар» ва адан маничияр вири лезгийриз сейли авунай.
   - Вахъ жуван уьмуьрда гел тур хъсан югъ авани? – Садра гьикI ятIани жузунай за Жемиладивай. Гьасятда жаваб ганай ада:
   - 1999-йисан 4-январдин югъ. А юкъуз куьне зун «Сувар» ансамблдиз кьабулнай.
    - Бес пис югъ?
    - Югъ ваъ, йисар. – Вилерал накъвар акьалтнай адан. - Абур квекай къакъатай са шумуд йис я. Зун Бакудай цIийи кьилелай КцIариз куьч жез мажбур хьанай. Куьн авачиз, «Сувар» галачиз яшамишун заз акьван четин тир хьи…. А йисар за жуван уьмуьрдиз кхьизвач.
РикIе авайди чуьнуьхар тавуна лугьун къенивилин лишан я. Гьа ихьтин руш я  Жемила. Адахъ галаз санал 30-далай гзаф манияр теснифна чна. Жемиладин          «Тамуяр», «Асса», «Цифер ава», «Ватандин чил», «Ватин гъал», «Дагълар», «Лугьу­дани, лугьудачни?», «Къафкъаз», «Мехъер я», «Ватан – чи чIал я», «КIанда лагь заз» хьтин манияр лезги хитариз элкъвенва. А манийри лезги рушаз сейливал гъанва. Ада «Сувар» ансамблдин  сейли маничияр Жавагьир Абдуловадихъ, Эльвина Гьейдаровадихъ ва Роза Гьажимурадовадихъ галаз санал лагьай  манияр лагьайтIа, мецера гьатнава. Къе агъзурралди лезгидин гзаф рикI алай маничидиз элкъвенвай Жемила Заловадиз хас кьетIенвилерикай сад адан зегьметдал рикI хьунухь я. ДатIана цIийи мани кIанда адаз завай, варцаралди, рикI алаз кIвалахда абурун винел.  Вичин кIвали михьивиляй рекIв гуда, дадлу хуьрекар чрана  суфра захавилелди хайибурун, кIанибурун вилик ахъаюникай хуш къведа адаз. 
    Жемила тек лезги маничи туш. А.Зейналлыдин тIварунихъ галай Азербайжандин  Музыкадин Коллеж акьалтIарай ада вичин муаллим хьайи зурба сеняткар Забит Небизадедивай мугъамдин сирер чирнава. Гьавиляй азербайжан, туьрк, гьакIни дуьньядин халкьарин манияр пешекарвилелди тамамарзава руша. 2011-йисуз Туьркияда кьиле фейи Анадолу фестивалда кьве иер лезги руша – Жавагьир Абдуловадини Жемила Заловади  Анкарадин виш агъзурдалай гзаф инсанар гьакьзавай  майдандиз кIватI хьанвайбур чпин ванералди гьейранарнай.
    Алатай йисуз чпин мехъерар хьайи Жемиладинни Намикан хизандин бахтлувал абурун Нигар тIвар алай руша артухарнава.  Жемиладин иер вилера дидевилин экверни куькIуьннава. Хизандин къайгъуяр чIугун, аял хуьн са акьван регьят туштIани, ам сенятдихъ мад гьа эвелан хьиз эгечIзава. Вичин сад лагьай альбом акъудун патал  цIийи манийрин винел кIвалахзава Жемилади. Агалкьунар хьурай ваз, лезги тават!
 
 

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я Кьве шаир илифна… Öyünməli məktəb Заокеанская музыка в Кусарах Сырные гонки
Статьи из этой рубрики
«Сувар» ансамблдин 20 йис! Лезги фольклордин няни «Сувар» вновь поразил зрителей Решадан шегьре рехъ Розадин мурад
ЦIИЙИ ТИЛИТ
№: 8(353)
декабрь, 2021

Скачать PDF

РУБРИКИ
Tarixin izi ilə
Gəncliyimiz – qürurumuz
Чи къагьриманар
Yubiley
Люди и судьбы
Шаирар
"Самур" - 30
Редакциядин дустар
Яран сувар
Qarabağ müharibəsi
Diqqət: İnsan taleyi!
İnam və iman
"Soyuq günəş"
ЦIийи фильм
Dünya xalqları
Чи тарих
Тарих авайвал
Müsahibə
Спасём планету
Dünya ləzgiləri
Дагъустан
Диктант
Чи кьегьалар
Редактордин гаф
Чи классикар
"Самур" - 20
Мах
ЦIийи ктабар
Жеч гьа!..
Dağıstan xalqları
И чил хайи диге я
Добрые вести
Milli Məclisə məktub
Новости Россотрудничества
Известные лезгины
Марагълу инсанар
Redaksiyaya məktub
Языки мира
Лезги чIалан месэлаяр
Квез чидани?
Известные лезгиноведы
Лезгияр вирина
Юбилей
SOS!!!
С верой в душе
"Самурдин мектеб"
Мораль
Чи адетар
Məşhur ləzgilər
Новости на все голоса
Чи хуьрер
Хъсан хабарар
Известные кавказоведы
Чи адетар
Yeniliklər
Чешне къачу!
Чакай кхьенай ...
Алимрин веревирдер
Çıxışlarımızın əks-sədası
Барка
Эпитафия
Ша, лезги чIалал рахан!
Хабарар
Тарихдин геле аваз
Поэзия
Харусенят
Этнография
Дагестан
Народы мира
Спорт
Инсанар, кьисметар
Редакциядиз чар
Чир-течир
Yeni kitablar
Фольклор
Чи сейлибур
Дайджест
Чи тавдин кIвал

ПОЛЕЗНОЕ