Аваз хьурай "Лезги газет"!
Кьилин редактордиз чар Барка  |  1(248) 2012      

     Играми Агъариза муаллим! Алатай йисан 14-декабрдиз Магьачкъалада кьиле фейи “Лезги газетдин” 90 йисан юбилейдин мярекат тарихдиз элкъвена. Са йис алатайдалай кьулухъ кьиле тухвай и мярекат акьван гурлуди хьана хьи, шумудни са кIелзавайбур исятдани адан таъсирдик кума. Гьайиф хьи, куь теклифдин чарар чав 14-декабрдиз агакьна, гьавиляй юбилейдин мярекатда иштирак авун чаз несиб хьанач. Чалай анжах “Самурдин” 2011-йисан 24-декабрдин нумрада редакциядин коллектив ва кIелзавайбур тебрикин алакьна.
    Гьар гьикI ятIани, “Лезги газетди” фейи рекьи чахъ руьгь кутазва, чна адалди дамахзава, адалай чешне къачузва. 80 йисан юбилейдин вахтунда “Лезги газет” лезги халкьдин мез, рикI алай ва кьилин газет я лагьанай чна. Кьилин редакторди хьиз Куьне чи журналистикадик кутур пай кьилди къейд авунай. Авайвал лагьайтIа, гьам Куьне, гьамни чна гьа са шартIара газет акъудиз гатIуннай. Чи четинвилерни, дарвилерни гьа сад хьтинбур тир. Алатай асирдин 90-йисара - четин, какахьай девирда, чIехи дегишвилерин макъамда арадал атай “Самур” газет кIевера гьатнавай, ам саки акъат хъийизмачир. Адал чан хкана кIанзавай, адакай халкьдиз лайих тир газет авуна кIанзавай. И карда чаз квелай хъсан ни куьмекдай кьван? Амма “Лезги газетдин” гьаларни хъсанзавачир. Куьн редакторвиле тайин хьайи 1994-йисуз газетдин тираж лап тIимил хьанвай, ам вирини-вири 4 агъзур касди къачузвай. Гила “Лезги газетдин” тираж 11 агъзурдалай алатнава ва и рекьяй Дагъустан Республикадин кIвенкIвечи я. Бес им Куьне чIугур кьван зегьметрин бегьер тушни?
    ЧIехи алим Мегьамед эфенди ал Ахтыдин несилдай тир Куьне женгчи журналистди хьиз редакциядин кIвалахдин къайдаяр цIийи хъувуна, газетдив цIийи къуватар агудна, коллективдин гьуьрмет къазанмишна. Куьн “Лезги газетдикай” халкьдин ва халкь патал тир, фикирар азаддаказ лугьудай, кIелзавайбурун патай ихтибар авай хци ва метлеблу газет авун патал ара датIана алахъна. Авайвал лугьун, Квелай и кар лап хъсандиз алакьна. Къе дурумлу, чIехи-гъвечIи чидай, гьуьрмет-хатур авай коллективди акъудзава “Лезги газет”. Редакциядин вири кIвалахдарар пешедал рикI алай, чIехи алакьунар авай устадар я. Гьавиляй “Лезги газет” кIелзавайбурун ва кхьизвайбурун кьадардал гьалтайла Дагъустандин амай халкьарин газетрив гекъигайла гзаф я. Им рикI шадардай кар я. Чаз ихьтин газетдихъ виш йисар хьана кIан я.
    Гила къвен чи алакъайрал. Азербайжандин лезгийриз, абурун дуланажагъдиз, яратмишунриз талукь макъалаяр чапзавай “Лезги газетди” чи республикадин  къелемэгьлийриз, жегьил шаирризни къайгъу къалурзава, чка атунивай абурун эсерар Дагъустандин кIелзавайбурув агакьарзава. И къайгъударвал чна - “Самур” газетдин кIвалахдаррини гьисс ийизва. “Самур” газетдикай сифте яз гегьеншдиз кхьейдини “Лезги газет” я. Санлай къачурла куьне чи гзаф шиирар ва макъалаярни чапнава.
Куьне “Самурдиз” гайи куьмекар рикIелай ракъуриз жедайбур туш. Газет акъудиз эгечIай сифте вахтара чун Куь кьилив атанай, Квевай гьикьван хийирлу меслятар къачунай. Куьне сифте яз чи газетдиз Дагъустандин кIелзавайбурухъ галаз алакъаяр арадал гъиз куьмек ганай. И алакъаяр къвердавай вилик фена. Алай вахтунда редакцияди анжах Дагъустандин кIелзавайбурулай гьар йисуз 200-300 чар къачузва.
    1999-йисан эхирра Куьне Магьачкъалада “Самур” гзетдиз талукьарнавай элкъвей стол тешкилнай. И столдихъ  суьгьбетар авур Куьне, Мердали Жалилова, Шихмурад Шихмурадова, Тажидин Мегьамедова ва масабуру газетдиз чIехи тир къимет ганай. “Чна “Самурдин” журналистривай пешекарвал чирзава” лагьанай Куьне. “Ада гьар са лезгидин руьгьдик вичин виртIедин дад кутазва” лагьанай Мердалиди. “Газетди хайи чIал вилин нине хьиз хуьзва, вилик тухузва” лагьанай Шихмурада. Куь гафари чак руьгь кутунай. “Лезги газет” чун патал мектебдиз элкъвенай. Чна гьевесдалди чи халкьдин кьилин газетдикай, адан тарихдикай, журналистрикай “Самурдин” чинриз макъалаяр акъуднай. Гьа икI, шумуд йисар я чна къуьн-къуьне туна санал гакъисагъвилелди кIвалахиз.
      Гила “Самур” акъатиз 20 йис хьанва. Куь суварилай гуьгъуьниз чи сувар алукьнава. Гьакъикъатда суварар сад садак какахьнава. Чахъ мартдин сифте кьилера газетдин юбилей къейд ийидай ният ава. Четинвилеризни дарвилериз килиг тавуна мярекат тешкилна кIанзава.
     Играми Агъариза муаллим! Информация чукIурунин йигинвал артух хьанвай, интернет кардик акатнавай алай девирда газет акъудун, ам кIанарун са акьванни регьят кар туш. 20-30 йис инлай вилик газетар кьиляй-кьилиз кIелзавайтIа, гила абурун чинриз вил язава, марагълу кьилер, шикилар, гекъигунар акуртIа абуру фикир желбзава. Гьавиляй журналистрин вилик и рекьяй чпин кIвалах хъсанарунин, цIийивилер тунин, жавабдарвал артухарунин везифа акъвазнава. Чалай кIелзавайбур мягьтелариз, гьейранариз, абуруз кIани месэлайрикай кхьиз алакьна кIанзава. Алакьни ийида! Чи чIал, меденият, тарих хуьн патал гьам “Лезги газет”, гьамни “Самур” сергьятар хуьзвай аскерар хьиз халкьдин къуллугъда акъвазна кIанзава. Акъвазни ийида!
Халкьдихъ галаз санал кам камуна аваз вилик фидай нуьсрет гурай чаз Аллагьди!
Аваз хьурай “Лезги газет”, аваз хьурай “Самур”!


Седакъет Керимова,
Муьзеффер Меликмамедов

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
Фаридади кукIушар рамда Лекьре хьиз кьуьлда Намбургдин лезги хизан Михаил Ихилов Чирхчирвал
Статьи из этой рубрики
Cедакъет Керимова - 60 «Сувар»у скоро 20 лет Халкьдиз бахш авур уьмуьр 300 лагьай тилит Ктаб кхьена
ЦIИЙИ ТИЛИТ
№: 9(314)
октябрь, 2017

Скачать PDF

РУБРИКИ

ПОЛЕЗНОЕ