Къубада ичерин сувар Хабарар  |  10(269) 2013  |  АЗИЗРИН Севда

И мукьвара Азербайжандин кеферпатан иер шегьеррикай сад тир Къубада «Ичерин сувар» тIвар алаз гуьгьуьлар шадардай зурба са мярекат кьиле фена. Гьейдар Алиеван тIварунихъ галай  паркуна хьайи сувара райондин регьберри, интеллигенциядин векилри, Милли Межлисдин депутатри, къецепатан уьлквейра яшамиш жезвай къубавийри, 100-далай гзаф уьлкведай райондиз илифай мугьманри иштиракна. Азербайжанда кIвалахзавай къецепатан уьлквейрин посолар ва дипломатик корпусрин кIвалахдарар иниз чпин хизанарни галаз атанвай.
Мярекатдиз атайбур Гь.Алиеван гуьмбетдин вилик цуькверин кIунчIар эцигайдалай кьулухъ балкIанрал алай жегьилри элкъуьрна кьунвай майдан галайнихъ фена. Гьа инал хьайи легьзеяр рикI ахъайдайбур тир.
Районда яшамиш жезвай кьадардал гьалтайла тIимил тир халкьарин векилар милли пекер алаз абурун вилик экъечIна. Ругуд гектардин чилел туькIуьрнавай чкадин халкьарин милли адетар, абурун ацукьун-къарагъун къалурзавай «Къадим Къуба» композициядин вилик виридалайни гзаф инсанар кIватI хьанвай. Райондин къадим этносриз талукьарнавай стендри вири чпихъ ялзавай. Сувар паталди туькIуьрнавай сегьнедилай азербайжан, лезги, тат ва маса чIаларал лугьузвай манийрин ванер чкIизвай, кIвачерик звер кутадай кьуьлери суварин гурлувал артухарзавай.
Ахпа парад хьана. Вири республикадиз сейли тир Къубадин багъларин иер савкьватар - ичерин цIудралди сортар авай дамахарнавай машинрин карванри параддиз иллаки ярашух гаузвай.
Къубада кьвед лагьай гъилера кьиле фейи и сувар виридан рикIяй хьана.

АЗИЗРИН Севда