Кавказ Чир-течир  |  1(260) 2013  |  Абдуселим Исмаилов

А.С. Пушкин

Кавказ агъада. Кьакьанда – зун сад,
Къалин живерин, дагьаррин кьилел.
Яргъай хьиз тек лекь кукIушдин винел
Къудгъунна цавуз, гуьзетиз кьуд пад.
Аквазва заз кIам, булах хазвайвал,
Дагъдин чинай жив, рагар къвазвайвал.

КIаникай цифер физва секиндиз,
Абурун юкь атIуз чарчарар рахаз.
Ухшар туш кьецIил и раг а рагаз.
Агъадай кьатIуз жезва четиндиз
Кул-кусар, ахпани тамар къалин тир,
Къушрав къуш рахаз, миргер йигин тир.

Мадни агъада – дагъвийрин хуьрер,
Суьруьяр къекъвез кьакьан пелера.
ЭвичIзава дагъ мублагь чилерал,
Арагва вацIун серин тир кьерел.
Терек вацIув гва ана гургьагур,
Хуьзва дагъвиди къакъара гапур.

ВацIар пехъи я, ничхир хьиз жегьил,
Ракьун къефесдай якIун ранг акур,
Яд чикIиз, акьаз кьерера агъур,
Лепейри мез гуз рагариз кьецIил...
Файдасуз крар – шадвал гьатзавач,
Лал рагари цин хъилер кIватIзава.

Урус чIалай элкъуьрайди
Абдуселим Исмаилов я.