Чи республикади Европадин Советдин “Кьадардал гьалтайла тIимил халкьар хуьнин гьакъиндай сергьятра авай Конвенциядин” шартIариз гьикI амал ийизва?
ЕС-дин парламентдин кьве депутат - Ирландиядай тир Анастасия Гриская ва Албаниядай тир Серж Синани и суалдиз жаваб жагъурун патал и мукьвара Азербайжандиз атанвай. Страсбургдин кьадардал гьалтайла тIимил халкьарин месэлайрихъ галаз маш-гъул тир экспертрин группадик квай абуру чи республикадин халкьарин ихтиярар ва азадвилер хуьникай зулуз Европарламентда авуна кIанзавай доклад патал делилар кIватIзавай.
Европадин Советдин Бакудин офисда чара-чара группайрихъ галаз кьилди гуьруьшмиш хьайи экспертар гьялна кIанзавай месэлаяр гьар са халкьдин векилривай чириз эгечIна. 9-июлдиз кьиле фейи ихьтин гуьруьшрикай сада чи республикадин лезги, авар, будугъ ва гуржи халкьарин векилри иштиракнай. Экспертрин суалриз жаваб гайи «Самур» газетдин кьилин редактор Седакъет Керимовади Азербайжанди аслу туширвал къазанмишайдалай инихъ адан кьадардал гьалтайла тIимил халкьарин уьмуьрда хъсан патахъ кьиле фейи дегишвилерикай рахана ва бюрократиядин энгелар себеб яз арадал къвезвай са бязи татугайвилерикайни ихтилатна.
Ам лезгийрин меденият вилик тухун патал гьялна кIанзавай месэлайрикай рахана. И месэлайрик лезгияр сигъдаказ яшамиш жезвай хуьрерин мектебра лезги чIалан тарсарин ери хъсанарун, лезги чIалан муаллимар гьазурун, учебникар чапдай акъудун ва мсб. акатзава. 1992-йисалай инихъ республикадин радиодай гьафтеда кьведра 15 декьикьада лезги чIалал гузвай гунугриз эхиримжи са шумуд йисуз республикадин лезги агьалийривай яб гуз тежезвайди къейд авур С.Керимовади Ижтимаи телевидениди милли чIаларал, гьабурукай яз лезги чIалал гунугар гьазурун важиблу тирди малумарна.
Азербайжандин лезгийрин уьмуьрда кьетIен роль къугъвазвай «Самур» газетдиз гьукуматдин куьмекдин игьтияж ава лагьай  С.Керимовади гьакIни вичин 20 йис татам хьанвай «Самур» Лезги Милли Меркез къедалди офис авачиз амайди къейд авуна.
Гуьруьшда Азербайжандин гуржийрин диаспорадин кьил, кхьираг-журналист Анна Барткулашвили-ди, авар жемиятдин кьил Мегьамед Бороева, БГУ-дин профессор Эседулла Къурбанова республикадин кьадардал гьалтайла тIимил халкьарин гьялна кIанзавай месэлайрикай, абурун меденият ва чIал вилик тухун патал важиблу тир крарикай рахана.