Шушада фестиваль Хабарар  |  5(350) 2021  |  САМУР
    Алай йисан 12-13 майдиз Шушадин Жыдыр дуьз-да «Харыбуьлбуьл» музыкадин фестиваль кьиле фена. Мярекатда Азербайжан Республикадин Президент Илгьам Алиева, сад лагьай ханум Мегьрибан Алиевади, абурун рушари – Лейла Алиевади ва Арзу Алиевади иштиракна. 
    13-майдиз гайи концертда Уьзейир Гьажибегован, Фикрет Эмирован, Къара Къараеван, Муслим Магомаеван, Ниязидин, Тофик Къулиеван, Васиф Адигуьзелован, Алекбер Тагъиеван эсерар тамамарна. Халкьдин артистар тир Алим Кьасумова, Полад Буьлбуьлогълуди, Динара Алиевади, Фергьад Беделбейлиди, Мансум Ибрагьимова, Азерина ва масадбуру манияр лагьайла яб акалзавайбуру яргъалди капар ягъана. 
    Фестивалда Азербайжанда яшамиш жезвай халкьарин музыкадин коллективри, абурукай яз КцIар райондин «Мел» фольклордин ансамблдини вичин алакьунар къалурна. Яб акалзавайбуруз лезги халкьдин манидикай гзаф хуш атана.
    Фестивалдин вахтунда рахай Президент Илгьам Алиева лагьана: «Азербайжандин вири халкьар санал дуствилелди, стхавилелди яшамиш жезва. 44 юкъуз кьиле фейи Ватандин дяведини икI тирди, чи уьлкведа милли садвал авайди мад гъилера субутна. Сад лагьай фестивалда Азербайжанда яшамиш жезвай халкьарин векилри мукьувай иштиракзава. Гьа идалди чна инай – Шушадай, чи къадим чилерилай вири дуьньядиз чирзава».