Радим Халикьов Чи къагьриманар  |  5(350) 2021  |  САМУР

    Гзаф йисара Россиядин сергьятар хуьдай кьушунда къуллугъ авур капитан Радим Халикьоваз адан урус дустари «Лезги лекь» лугьудай. Вучиз лагьайтIа сергьятар хуьнал гзаф уях тир ва датIана масадбуруз чешне къалурдай. 2003-йисуз ватандин рекье гьелек хьайила адан 33 йис тир.

    1994-йисуз сергьятар хуьдай кьушунда къуллугъ ийиз эгечIай Радима 1999-2002-йисара Россиядин ФСБ-дин Москвадин Сергьятрин Институтда кIелнай. Вичин алакьунризни агалкьунриз килигна 2001-йисуз адаз нубат хуьн тавуна капитанвилин чин ганай. Са йис алатайла Р.Халикьов «Мококдин» 3 лагьай сергьят хуьзвай заставадиз регьбервал гуз эгечIна.

    2003-йисан 15-декабрдиз адаз чкадин агьалийри яракьар гвай кIеретдикай хабар гана. Ам вичин 8 аскерни галаз кIеретдин геле гьатна. Ингье Шаури хуьруьн патав абур чинеба рехъ атIана акъвазнавай яракьлуйрин гъиле гьатна. Дяведа аскерар вири терг хьана. Руслан Гелаеван дестедай тир террористри чукIулдив залан хирер алай Радиман кьил атIана. 

    2004-йисан 22-январдиз кьегьал лезгидиз «Россиядин Федерациядин Къагьриман» гьуьрметдин тIвар гана. Кьасумхуьруьн са куьчедиз, гьакIни Юкьван СтIал хуьруьн са куьчедизни мектебдиз адан тIвар ганва. Хайи хуьре кишпирдикай Р.Халикьован гуьмбет хкажнава ва къагьримандин музей кардик кутунва.