Руьгь кутазва ЦIийи ктабар  |  4(349) 2021  |  Азизрин СЕВДА
    И йикъара Бакудин «Red Line» MMC чапханади Агъаверди Аливердиеван «Вун авачир дуьнья» ктаб чапдай акъуднава. Алай вахтунда КцIар райондин Мучугъ хуьре яшамиш жезвай, вичин яшар 80-алай алатнавай А.Аливердиев «Самур» газетдин чIехи дуст ва виридалайни хъсан штатдик квачир мухбиррикай я. Гьавиляй гзаф йисара хайи газетдик рикI кана чи крарик къуьн кутур Агъаверди Аливердиеван «Вун авачир дуьнья» ктаб «Самур» газетдин редакцияди туькIуьрна арадиз акъудна.
    Алатай асирдин 60-70-йисара сифте яз вичин цIудралди гьикаяяр газетрин, журналрин, кIватIалрин чинриз акъатай, «ВакIан як», «Сив хуьн», «Усал кас», «Гелер», «ГъарикI мани» гьикаяйралди кIелдайбуруз сейли хьайи А.Аливердиеван ктабда ада эхиримжи йисара кхьенвай шиирар, хкетар, макъалаяр ва повесть гьатнава.
    А.Аливердиева тIебиатдикай, гьайванрикайни къушарикай цIудралди гьикаяяр къелемдиз къачунва. Абур чи аялар патал гзаф къиметлу эсерар я. Гьикаяяр куьруьз, аялар гъавурда акьадайвал, фасагьатлу чIалал кхьенва. Абуру аялриз тIебиат, гьайванар ва къушар хъсандиз чирдай мумкинвал гузва, хайи чилни хайи чIал, ватан кIанарзава.
    ЦIийи ктаб кIелдайбурук руьгь кутадайди я. ИкI тирди автордин лейтмотив хьиз ганвай шиирдайни чир жезва: 
 
ЧIуру ятIа эгер ви гам,
Лугьумир хьи, ян хъсан я.
ЛаматI, кагьал лезгидилай,
Ватандин са къван хъсан я.
 
Азизрин СЕВДА