Стадионар эцигда Хабарар  |  1(346) 2021  |  САМУР
    Республикадин жегьилринни спортдин министерстводи Къарабагъдин душмандивай азад хьанвай чилерал гьихьтин эцигунар кьиле тухудатIа хабар ганва. И малуматдив кьадайвал, Шуша, Келбежер, Лачин, Фуьзули, Жебраил, Зенгилан, Къубадлы ва Агъдам шегьерра цIийи стадионар эцигда. Агъдамдин машгьур «Имарат» майдан цIийи кьилелай туьхкIуьрда. Жебраил райондин Буьйуьк Мержанлы хуьрени къугъунрин майдан кардик кутада. 
    Азад хьанвай вири районра шагьматдин мектебар, Шушада гьакIни шагьматдин клуб эцигда. Зенгилан райондин Миндживан посёлокдани шагьматдин мектеб эцигун къарардиз къачунва. Са шумуд районда – Фуьзулида, Къубадлыда, Келбежерда, Зенгиланда ва Шушада аялринни жегьилрин спортдин мектебар кардик кутада. И районра, гьакIни Агъдамда, Шушада ва Лачинда футболдинни волейболдин майданар арадал гъида. 
    Ихьтин эцигунрилай гъейри Агъдамда спортдин ва сагъламвал хуьдай парк, гьакIни сирнав ийидай меркез, Жебраилда ва Лачинда спортдин залар, Шушада «Къарабагъ» тIвар ганвай спортдин чIехи майдан эцигна кардик кутада.