ЧIалакай муг ийин Поэзия  |  1(346) 2021  |  Ульяна МЕДЖИДОВА

    Вич Дагъустандин СтIал Сулейманан райондай тир, Сургутда университет акьалтIарнавай лезги тават Ульяна Меджидовадин агалкьунар руьгь кутадайбур я. Дидед чIалал рикI алай и руша къелемдиз къачунвай шиирри лезги поэзиядиз вичин кьилдин рехъ авай викIегь шаир къвезвайдакай хабар гузва. Фейсбукда пайнавай адан веревирдер чна чи газетдин кIелдайбурув агакьарзава.

    Ша ч1алакай муг ийин. Ибур гьак1 лугьузвай гафар туш, гьелбетда, виридаз чидайвал, къушар мекьи хьайила лув гана чими ульквейриз фида, амма гатфар алукьайла, чпин хайи чилел хкведа. Хтана чпиз мукар расда. Ша чнани къушарилай чешне къачун. Фикир гайит1а, чунни гьабур хьиз ватандай яргъариз к1валахиз физва, амма хайи чилел хтайла, хайи чиликай муг авуна к1анда, гьа и мука анжах са ваз хас тир лезги ч1алал рахана к1анда.

    Жуван цIараралди заз и гафар теснифиз к1анзава:
 
За ч1алакай муг ийида,
Шаирвилиз генг рехъ гудай.
За ч1алакай ц1ук ийида,
Ялав хьана, чаз экв гудай.
 
    Урусрин ва маса миллетрин юкьва к1валахдайла, гьелбетда, урус ч1алал рахана к1анзава , сад-садан  гъавурда акьадайвал, амма жуван халкьдин арада вучда вуна урус ч1алакай? Ам ви кьилин винизвал яни? Кьилин винизвал ам туш, кьилин винизвал жуванбурухъ галаз чи чIехи бубаяр, дидеяр рахай чи хайи ч1алал рахун я! Ша чна чи дидед ч1ал  квадар тавуна ам рик1ел  хуьн!
 
Ульяна МЕДЖИДОВА

 

Сургут, Ханты-Мансийск