Гуьнгуьна хтуна Хабарар  |  8(345) 2020  |  САМУР
    Гьейдар Алиеван Фондуни Къебеле райондин Ниж посёлокдин албан килиса цIийи кьилелай гуьнгуьна хтуна, виликан тегьердиз хкана и йикъара кардик кухтунва. Ина чеб албан тайифайрикай тир, христианвал хвенвай удинриз ибадат авун патал вири жуьредин къулайвилер туькIуьрнава.
    И килиса Къафкъаздин Албанияда сифте яз христианвал теблигъ авур ибадатханайрикай сад я. Моисей КьакьанкъатвацIвиди вичин «Агъван уьлкведин тарих» ктабда кхьенвайвал, каталикос Григорис кьейидалай гуьгъуьниз Албанияда христианвал зайиф жез арадай акъатзавай. Гьавиляй Къуьдс шегьердай са шумуд кас христианвал цIийи кьилелай теблигъ авун патал Уди вилаятдиз ракъурнай. Абуру Удидилай ЧIур вилаятдалди христиан дин кIвачел ахкьалдарнай. Гуьгъуьнлай а ксар акъвазай чуьлда, гилан Ниж хуьр алай чкадал килиса эцигнай. И килисади гьам Удида, гьамни патарив гвай вилаятра христианвал хуьз мукьувай куьмек ганай. 
    Алай вахтунда дуьньяда 10 агъзур удинар ава. Абурукай 4 агъзур кас Нижда яшамиш жезва.