Куьмек гуда Хабарар  |  8(345) 2020  |  САМУР
    И йикъара чи республикадин зегьметдин ва агьалияр социальный рекьяй хуьдай министерствода кьиле фейи ижласдал Къарабагъдин дяведа кьейибурун хизанриз гьукуматдин патай гьихьтин куьмекар гудатIа веревирдер авуна. Куьмекар гудайла, сагъарзавай аскеррихъ галаз гуьруьшдин вахтунда Азербайжан Республикадин Президент Илгьам Алиева гайи тапшуругъар асасдиз къачуда. Президентди лагьайвал, Азербайжандин Яракьлу Къуватри Ватандин дяведа 44 йикъан къене чи чилер эрмени  чапхунчийрикай азад авуна. Гьавиляй шегьидрин ва набут хьанвайбурун хизанар вири патарихъай уьмуьрдин такьатралди таъминарна кIанзава. Абурун яшайишдин шартIар хъсанарун, кIвалахдив таъминарун паталди ганвай тапшуругъар галай-галайвал кьилиз акъудун гьукуматдин вири талукь идарайрин буржи я. 
    Ижласдал къейд авурвал, исятда 1500 кьван шегьидрин ва набутрин хизанриз кIвалер гун паталди крар тамамарзава. Маса гьихьтин куьмекар гудатIа, гьабурни тайинарнава. Гьа са вахтунда эрмени террордикай зиян галукьнавай инсанризни куьмекар гун къарардиз къачунва.