РикIел хкана Редакциядин дустар  |  8(345) 2020  |  Седакъет КЕРИМОВА
    Мукьвара КцIар райондин Уьнуьгъ хуьруьз илифай за хуьруьнвийрив «Самурдин» эхиримжи тилитдикай са шумуд газет вугайла мектебдин муаллим Азер Мамедова абурукай сад гьасятда чара авуна:
    – Им Нуреддин Хейировал агакьарна кIанда. «Самурдал» гзаф рикI алай кас я. Са цIарни тутуна кIелзавайди я ада куь газет. Вири нумраяр хвенвайди я а касди, – лагьанай.
    Са герендилай гьа агъсакъал вич чи кьилив атана. Им акунар авай, рикIиз чими кас тир. Вилерал шел акьалтна, хвешила раханай ам чав:
    – Дидед чIал чаз икьван кIанарзавай пара кьван сагърай куьн! Четинвилерни дарвилер кваз такьуна лезги чIалал газет акъудзавай куь зегьметар квахь тавурай. За 28 йис я и газет кхьиз. Нефес гьадав къачузвайди я. И йисара акъатай вири нумраяр хвенва за, тек кьуд нумрадилай гъейри. Гьабурни зи са чирхчирди тенбек чIугун патал завай къакъудайди ахпа чир хьана заз, – лагьана хъуьрена ам. Ахпа вичин ихтилатдиз давамна: 
    – Куьне ковид лугьудай и бала акъатайла кьве вацра газет акъуднач. Гьа береда кьарай атIанай зи. Вуч хъсан я хьи, гуьгъуьнлай ахкъудна куьне газет. Чи вилериз экв хтана. «Самур» газет чи гьар са затI я – чи чIал, чи тарих, чи меденият, чи намус, чи бармак я ам. Чавай квез са куьмек гуз жезвачтIани, датIана алхишзава чна. Газетдин уьмуьр яргъи хьурай!
    РикI ацIанвай и агъсакъалди гзаф алхишар авуна чи газетдин кIвалахдарриз. Варзни зуралай вичин 80 яшар хьана кIанзавай Хейиров Нуреддин Хейиран хцин гафари руьгь кутуна чак. Абуру газет хвена кIанзавайди, са куьнизни килиг тавуна ам чап авуна дидед чIал багьаз кьазвай ватанэгьлийрал агакьарун чи буржи тирди мад гъилера чи рикIел хкана.
 
С.КЕРИМОВА