Халкьдин шаирриз гуьмбет Дагъустан  |  5(342) 2020  |  САМУР
    Алай йисан 4-августдиз Дагъустан Республикадин Гьукуматдин кьил Артем Здунова Дагъустандин халкьдин шаирар тир  СтIал Сулейманазни Абуталиб Къафуроваз  эцигнавай гуьмбет ачухунин шад мярекатда иштиракна. Ам Дагъустандин Къенепатан Крарин Министерстводин дараматдин вилик квай багъда хкажнава.
    Гуьмбетдин авторар Россиядин Федерациядин лайихлу художник, Дагъустандин скульптор Али Мегьамедов ва адан хва Мегьамед я. Абуру гуьмбетдал зур йисалай гзаф вахтунда зегьмет чIугуна.
    Скульптура-монумент гьар садан фикир желбдайди хьанва. Халкьдин кьве шаир, чан алайбур хьиз куьсридал ацукьна верцIи ихтилатдик ква. Мадни лагьайтIа, абур гьа багъда авай чпин дуст, халкьдин шаир Гьамзат ЦIадасадал (гуьмбет) кьил чIугваз атанва.
    Дагъустандин халкьдин кьве шаирдиз гуьмбет эцигдай меслятдал Шегьердин кьилин майдандал физвай и багъда гуьнгуьна кухтунин кIвалахар кьиле тухудайла атана ва и кар лайихлувилелди кьилиз акъудна. Са гафни авачиз, ихьтин зурба эсерри акьалтзавай несилдик ахлакьдин, марифатдин, ватанпересвилин, ватандашвилин руьгь кутаз куьмек гуда. 
    Гуьмбет ачухардай мярекатдал А.Здунова ихьтин теклиф гайи КъКМ-дин кьилиз разивал къалурна. Ада лагьана:
    - Дагъустандин халкьдин шаирар неинки чи республикадиз, гьакI Россиядиз ва къецепатан уьлквейризни сейли я. Суварар кьиле тухудайла, чи республикадиз гзаф мугьманар, туристар илифзава. И багъдиз атайла, абуруз дагъларин уьлкведин чIехи тарихар, къени крар аквада. Дагъустан мугьманрал рикI алай макан хьиз, зурба шаиррин ватанни я. Чна ийизвай ихьтин хъсан краралди гьар са касдиз Дагъустан ачухарзава.
    Шад мярекатдал республикадин къенепатан крарин министр Абдурашид Мегьамедов, Махачкъала шегьердин администрациядин кьил Салман Дадаев, Дагъустандин кхьирагрин кIватIалдин кьил Мегьамед Агьмедов, халкьдин шаиррин веледар, хтулар, птулар рахана. КIватI хьанвайбуру гуьмбетдал цуьквер эцигна.
 
СтIал Сулеймана лагьанай...
 
Са бязи инсанрин гъараз,
Тежез акьахун я тараз,
Вич пуд туьлек хьайи катраз
Пехърекай мидя жедайд туш.
 
         ***
Фикир ийиз жуван къулав, 
Ацукь акьул кIватIна къвалав,
Са затI вич бинедай чIулав,
Чуьхвена лацу жедайд туш.
 
         ***
Фагьумзава за ви крар,
Цаварик кутаз жеч гурар.
Ламран винел чергес пурар, – 
БалкIандивди тай жедайд туш.
  
        ***
Я кеш тийижиз, я кафал,
КIвенкI авуна рахаз кIуфал,
Сел къведайла вацIун рувал
Архайинз къаткиз жедайд туш.
 
         ***
Чизмач инсан акуналди,
Гафар зурбаз рахуналди,
Чакъалри, кIватI жез, хъуналди,
Куьрдин вацIай яд кими жеч.
 
         ***
Тум кафалда авай рагъул
Ахмакьдав чIугваз жедач къул,
Жуваз авай тIимил акьул,
Авачирдаз пай жедайд туш.

     ***