Чавай къакъатна Эпитафия  |  4(341) 2020  |  САМУР
   Вичихъ кьетӀен алакьунар авай, къени къилихрин инсан тир Сейфедин Сейфединов гьар са лезгидиз хайи халкь, хайи чил кӀанарзавай сеняткаррикай я. Ада чӀугунвай тӀебиатдин шикилрай ва цӀудралди кьегьал лезгийрин портретрай чаз Ватандин къамат аквазва. Сейфединан яратмишунрин ватанни хайи Ватан кьван чӀехи, девлетлу ва кӀубан я. Гьавиляй Швециядин ва Япониядин векилри адан «Кьил чӀугун» шикил къачун патал гзаф алахъунар авунай. 
   Пешекарри ада чӀугур Шейх Мегьамед Ярагъвидин портрет алай девирдин лап хъсан эсеррикай сад яз гьисабна «къе Дагъустанда Сейфединав къведай суьретчи бажагьат ава» лагьанай. Гьикьван кӀевера гьатнатӀани, гьикьван пехилбуру вичиз манийвилер авунатӀани, Сейфедин руьгьдай аватнач, сенятдин рекьяй мадни вилик фена. Ада чӀугур са бязи эсерар неинки Урусатдиз, гьакӀни къецепатан уьлквейриз сейли хьана. «Дагъустандин лайихлу художник» гьуьрметдин тӀвар къачур С.Сейфединова искусствода вичин мектеб арадиз гъана.
   Сейфедин Мигьиядин хва Сейфединов 1952-йисуз КцӀар райондин Манкъулидхуьре дидедиз хьана. Хуьруьн юкьван мектеб акьалтӀарна, художественный училищеда кӀелна. Аскервал кьилиз акъудай жегьилди Тифлисдин Художественный Академияда кӀелун къетӀ авуна. Ина ада СССР-дин халкьдин художник, академик У.Джапаридзедивай чирвилер къачуна. Академикдиз лезги кьегьалдин алакьунар гзафни-гзаф бегенмиш хьана. Тифлисда кӀелай ругуд йисан къене ада чӀугур шикилар Гуржистандин альбомра ва выставкайрин каталогра гьатна. Ада машгьур «Дата Туташхиа» фильм акъудуникни вичин пай кутуна. Академия акьалтӀарайла Сейфединаз ина кӀвалахал акъвазун теклифнай, амма жегьил сеняткар Ватандиз хтана. Академик Уча Джапаридзеди вичиз ядигар яз гайи кисть Сейфедина вичин уьмуьрдин эхирдалди хуьзвай. А кистинал «3и рикӀ алай шакIуртдиз» гафар атӀанва.
   1982-йисуз Дагъустандин Художникрин Союзда кӀвалахал акъвазай чи сейли сеняткар Дагъустандин ва Урусатдин выставкайрин иштиракчи хьанай. Гьеле 
гъвечӀизамаз адаз художник хьиз машгьур жез чи машгьур шаир Забит Ризванова куьмек ганай. КцӀарин Халкьдин Яратмишунрин КӀвалин директор тир вахтунда ада Сейфединан выставка тешкилнай. Адан куьмекдалди гъвечӀи художникдин шикилар Бакудиз, Москвадиз, халкьдин яратмишунрин выставкайриз, «Пионер» журналдиз акъатнай.
   Сейфединан чӀехи буба Сейфедин Гьасанбегов Бакуда лезги большевикрин «Фарукь» тешкилат арадал гъайибурукай сад тир. Адан буба Мигьияди Дербентдин педучилищеда СтӀал Мусаибахъ галаз санал кӀелнай. Ватандин ЧӀехи дяведа кьегьалвилелди иштирак авур, вич шумудни са ордендиз ва медалдиз лайих акур Мигьия ирид аялдин буба тир. Ада вичин аялрив кӀелиз тун патал вири жуьредин алахъунар авунай. И хизандай Сейфединан гъвечӀи стха Айзекани Тифлисдин Художественный Академия акьалтӀарна.
   Дагъустандин Магьачкъала шегьерда яшамиш хьайи С.Сейфединов цӀудралди тӀебиатдин шикилрин ва портретрин автор я. Ада чӀугунвай Шейх Мегьамед Ярагъвидин, Забит Ризванован, композитор Мегьамед Гьуьсейнован, шаир Фейзудин Нагъиеван портретар ва маса эсерар пешекарри искусстводин инжияр яз гьисабзава.
   И йикъара ван хьайи чIулав хабарди чи рикIер къарсурна. Лезги халкьдин тIвар-ван авай сеняткар чавай къакъатна. Сейфедин Сейфединован экуь къамат ам чидай вирибурун рикIера гьамишалугъ яз амукьда. Аллагьди рагьмет авурай!
 
«САМУР»