«ШАРАКIУНТI" ВУЧ Я? Квез чидани?  |  1(338) 2020  |  САМУР
   Чи эрадал къведалди 722-705 йисара II Саргон Ассириядин пачагь тирла ада маса чилер хьиз, Къафкъаздин чилерни кьунай. Адакай «III Ададнераридин (чи эрадал къведалди 813-812 йисар) ва II Саргонан летописра» гегьеншдиз кхьенва. (Килиг: Латышев В.В. Известия древних писателей о Скифии и Кавказе // BDU. 1947. №1-4). II Саргона лезгийрин чилер кьурла гилаy «ШаракIунтI» лугьузвай чкадал (Дагъустандин СтIал Сулейманан райондин Герейханован тIварунихъ галай совхоздин чилерал) чIехи кIеле эцигна, агьалияр вичин къанунралди идара авунай. Ассирий чIалал «шарукин» гафуни «къанун гвай пачагь» хьтин мана гузва. Тарихчийри кхьизвайвал, II Саргонахъ кьетIен къанунар гвай. Ада вичиз акси ксар гьасятда яна рекьидачир. Абурув залан кIвалахар ийиз тадай. Пашман хьана вичиз муьтIуьгъ хьайибуруз азадвал гудай. 
   Пачагьди вичин гъилик акатай чилерин агьалийрихъ хкIурдачир. Абуруз азаддаказ кIвалахдай мумкинвал гудай. Кьушундиз лазим тир кьван къуьл тадарак авурдалай кьулухъ амай ризкьи лежберриз тадай. Хуьруьнвийриз чпин нехирарни рамагар артухардай мумкинвилер гудай.
   Кеферпатан чапхунчийри II Саргоназ вичин къанунар тамамвилелди кьилиз акъуддай мумкинвал ганач. Ассириядин пачагь абурухъ галаз ягъ-ягъунра магълуб хьана. Чапхунчийри кIеле чукIурна ва чкадин агьалийриз гьелягьар кьуна. II Саргонан кIеле хьайи чка лезгийрин меце «Шардин (пачагьдин) кIунтI», гуьгъуьнин виш йисара «ШаракIунтI» хьиз амукьна. Са бязи тарихчийри Белидждинни Кьасумхуьруьн арада авай и чкадиз «ШаракIун» («Долина курганов») лугьузва.
 
"САМУР"