«Махарин сандух» ЦIийи ктабар  |  9(335) 2019  |  Роза Гьажимурадова
   И йикъара “Üfüq Servises” MMC-ди аялар патал лезги чIалал чапдай акъуднавай «Махарин сандух» ктабда чи халкьдин пуд мах гьатнава. А махар КцIар райондин Манкъулидхуьряй тир Тургъуя бадеди, Чпир хуьре яшамиш жезвай Тамам бадеди ва ТIигьиржал хуьруьн эгьли Герекмез бадеди сифте яз чпин хтулриз ахъайнавабур я.
   Аялриз кIевера гьатнавайбуруз куьмек гун, гьакъисагъвилелди зегьмет чIугун, четинвилерикай кичIе тахьун, дуствални вафалувал чирзавай махарив кьадайвал иер шикиларни чIугунва. Шикилар чIугунвайди алакьунар авай чIугвар Рагьима Мамедханова я. И шикилри махара авай образар ачухардай, аялривай абурун къилихар, тIебиатдин иервилер кьатIуз жедай мумкинвилер гузва.
   Иердиз, ранглуз акъуднавай ктаб туькIуьриз куьмек гайи­бур кцIарви Юсиф Халилов, «Уьфуькъ» тешкилатдин кIвалахдарар Офелия Пирвердиева, Роза Гьажимурадова ва Вуьсале Гьасанова я. Ктабдикай юкьван мектебрин агъа синифра кIелзавай аялривай менфят къачуз жеда.
Роза ГЬАЖИМУРАДОВА