Куьреда сувар Дагъустан  |  9(335) 2019  |  «Самур»
   Са береда вири Дагъустандиз Куьре магьал хьиз сейли хьайи, мублагь чилерин юкьни-юкьва экIя хьанвай, вичин къени инсанрин тарифар виринриз чкIанвай, гьар са лезгидин рикI алай Кьасумхуьре алай йисан 19-октябрдиз шадвилин, садвилин мярекатар кьиле фена. Ина райондин 90-йисан юбилей гзаф гурлудиз къейд авуна. 1969-йисан 12-майдиз чи чIехи шаир СтIал Сулейманан 100-йисан юбилейдихъ авсиятда райондин тIвар дегишарнай. Гьа чIавалай ам СтIал Сулейманан район хьиз сейли я. Эхиримжи йисара районди экономикадин, медениятдин ва руьгьдин рекьяй лугьуз тежедай кьван чIехи агалкьунар гъилик авуна.
   И агалкьунрик райондин кьил, филологиядин илимрин кандидат Нариман Абдулмуталибова чIехи пай кутуна. Хайи ватандални хайи халкьдал гзафни-гзаф рикI алай и ватанперес касдин алахъунрин нетижа яз ина чIехи эцигунар кьиле физва, агъзурралди цIийи кIвалахдин чкаяр кардик кутазва, абадвилер тухуз­ва. Эхиримжи са шумуд йисан къене райондиз 4 миллиард манат инвестиция ахъайнава. Идалай гъейри хайи райондин таъсиб чIугвазвай карчийри ина эцигунар ва абадвилер тухун паталди 700 миллион манат пулунин такьатар серфна. И карда чи халкьдин кьегьал хва Имам Яралиева чешне къалурзава. Райондин экономика вилик тухун патал ада вири жуьредин алахъунар ийизва. Ингье райондин виридалайни чIехи агалкьунрикай сад ина дидед чIал хуьн, ам вилик тухун патал кьиле тухузвай крар, конкурсар, проектар я. ЧIал хкажзавай гьерекатди дуьньядин чара-чара уьлквейра яшамиш жезвай лезгийрихъ руьгь кутазва.
СтIал Сулейманан район Куьре Мелик, Рухун Али, Етим Эмин, СтIал Сулейман, Алибег Фетягьов хьтин шаиррин, Гьасан Алкьвадарви хьтин камалэгьлидин ватан я. И райондай Дагъустандин пешекар музыкадин бине кутур Готфрид Гьасанов, гзаф йисара Россиядин ИА-дин Философиядин Институтдиз регьбервал гайи академик Абдусалам Гьуьсейнов хьтин зурба инсанар акъатнава.
   Юбилейдин юкъуз район халисан суварин гьавада авай. Ленинан гуьмбет алай майдандал 10 агъзурдалай гзаф инсанар кIватI хьанвай. Анал туькIуьрнавай кьакьан сегьнедилай кьуд патаз маничийри лугьузвай манийрин ванер чикIизвай. Халкь шадарун, адан руьгь хкажун патал вири жуьредин алахъунар авунвай. Инсанар кIубандаказ, хвешиз, кьил виневаз къекъвезвай.
   Нариман Абдулмуталибова виридаз сувар мубаракна райондин агалкьунрикай рахана. Дагъустандин Гьукуматдин кьил Артем Здунов ва сувариз атанвай гьукуматдин регьберар, министрар, тIвар-ван авай инсанар майдандал къалурзавай райондин 90-йисан тарихда кьиле фейи вакъиайриз талукьарнавай сегьнейриз килигиз эгечIна. 200-елай гзаф аялри иштирак авур и прог­раммади кIватI хьанвайбурук руьгь кутуна. Вишералди гъвечIи аялри, жегьилри, яшлубуру милли пекер алаз иштирак авур и тамашади, гьакIни районда суварихъ авсиятда акунвай вини дережадин гьазурвилери вири гьейранарна.
Концертдиз кьилди Бакудай «Сувар» ансамблдин солистризни эвернавай. Йифиз салютдин вахтунда инсанри майдандал халисан дем кутуна. Вишералди инсанар кьуьлуьник экечIна. Авайвал лагьайтIа, икьван гагьди чаз ихьтин тешкиллу, ихьтин гурлу ва руьгь кутадай сувар акурди тушир.
«Самур»