Демини вири агудна Фольклор  |  5(331) 2019  |  «САМУР»
     Алай йисан 4-майдиз Бакудин «Ай ишыгъы» ресторанда кьиле фейи деминин суракьар вириниз чкIана. «Сувар» Лезги Манийринни Кьуьлерин Халкьдин Ансамблди кьиле тухвай и мярекат гзаф гурлуди хьана. Санлай 440 касди иштирак авур дем марагълуди хьун паталди Завир Нежефов кьиле аваз «Сувар» ансамблди гзаф алахъунар авуна.
     Мярекатдин кьетIенвилерикай сад ам тир хьи, иниз деминал рикI алай вирибур - жегьилар, кьуьзуьбур, аялар атанвай. Кьуьлердайбурун акъажунрин конкурс виридан рикIяй хьана. Чубандин бармак маса гунин аукционди лагьайтIа, кIватI хьанвайбуруз гзаф шад легьзеяр бахшна. РикI ахъайдай кар ам тир хьи, чи халкьдин харусенятдин уьмуьрда вичин лайихлу чка кьунвай «Сувар» коллективдин макьамчийри, маничийри ва кьуьлдайбуру вирида сад хьиз деминик къуьн кутунвай.
     «Сувар»ин кьуьлдай аялри иниз цIийи гьава гъана. 44 аялдилай чпин алакьунралди вири мягьтелариз алакьна. Ансамблдин куьмекдалди хореографвилив агакьнавай Турал Самедовавай, Сабина Давидовадивай, Суна Султановадивай ва Гьажи Гьажиевавай тарс къачузвай гъвечIи солистрин викIегьвилиз гаф  авачир.
     Мярекатдал маничийри – Руслан Пирвердиева, Жавагьир Абдуловади, Жемила Заловади, Роза Гьажимурадовади ва Эльвина Гьейдаровади абур гъанвай. Дагъустан Республикадин лайихлу артист, са береда «Сувари» шегьредиз акъудай Руслан Пирвердиевани лезги манидин устад Жавагьир Абдуловади лезги, азербайжан ва урус чIаларал межлис акьван хъсандиз тухвана хьи, атайбуруз вахт мус акъатнатIани чир хьанач.
     Дагъустандай атанвай макьамчийрини чпин сеняткарвал къалурна. Абурухъ машгьур «Лезгинка» ансанмблдин ветеран Назир Идрисовни квай. Жюридик квайбур лагьайтIа, чи тIвар-ван авай алим Афер Алифов ва «Сувар» ансамбль арадиз гъана 20 йисуз адаз регьбервал гайи Седакъет Керимова тир. С.Керимовади мярекатдал чпихъ алакьунар авай цIудралди аялриз вичин ктабар савкьват яз гана.
     Инсанар деминай руьгь акатнаваз хъфена. Чара жерла виридан мецяй гьа са гафар акъатзавай: «Ихьтин мярекатар мукьвал-мукьвал тухун герек я».
 
«САМУР»