Зурба вакъиа ЦIийи ктабар  |  3(329) 2019  |  Айнур НОВРУЗБЕГОВА
     Гьар са мусурмандик руьгь кутазвай кьилин ктаб  - «Къуръан» лезги чIалал чапдай акъатнава лагьай хъсан хабар чав фадлай агакьнавай. Чи халкьдин уьмуьрда чIехи вакъиадиз элкъвенвай гьа ктаб гьикI гъилик ийин лугьуз хияллу хьанвай чун.
     И мукьвара чи тIвар-ван авай духтур ва динэгьли Сефербег Сефербегова чун кIеверай акъудна. Ада чаз  гьа ктаб савкьват яз гъана. «Пак Къуръан ва адан манайрин таржума лезги чIалал» тIвар ганвай 623 чиникай ибарат тир и ктаб Москвада басма хьанва. Ам лезги чIалаз элкъуьрнавайди мусурман алим Ямин Амрагьан хва Мегьамедов я.
     Россиядин муфтийрин советдин, РФ-дин мусурманрин диндин идарадин кьил, шейх Равил Гайнутдина ктабдиз кхьенвай сифте гафуна Ямин Мегьамедован таржумадиз чIехи къимет ганва ва ам лезги халкьди разивилелди кьабулдайди къейд авунва. Россиядин Илимрин Академиядин РагъэкъечIдайпатан Институтдин отделдин кьил, чи машгьур алим Аликбер Аликберован меслятдалди чапнавай и ктабдин редакторар Я.А.Мегьамедов, Гь.М.Мегьамедов, З.А.Рашидов ва А.М.Къардашов я.
     Алай аямдин полиграфиядин тIалабунрив кьадайвал, хъсандиз чапнавай и иер кIалубдин ктаб неинки динэгьлийрин, гьакI вири лезгийрин рикIяй жедайдан чIалахъ я чун.
Айнур НОВРУЗБЕГОВА