Масдардиз мукьва гафар "Самурдин мектеб"  |  11(316) 2017  |  САМУР
     Масдар глаголдин тIварцIин фор­ма я. Ам глаголди къалурзавай гьерекатдин, кардин, гьалдин тIвар я.
     Масдарди вуч авун? вуч хьун? суалриз жаваб гуда. Ам арадиз гъидай суффиксар -и, -ин, -ун, уьн я. Дегиш хьунин жигьетдай масдар существительнидиз ух­шар я: адаз гьамиша кьадардин ва падеждин категория хас я ва ам гьабуруз дегиш жеда.
     Муьжуьд сая глаголдиз ма­на жигьетдай масдардиз мукь­ва къуша формаярни ава: гу­нуг, гъунугъ, кьиникь, финиф, ху­нух, хъунухъ, хуьнуьх, хьунухь. Ихьтин фор­маяр са кьадар куьгьне хьан­­ва, абурукай къвердавай тIи­­мил менфят къачузва. Мас­дардинни и формайрин ара­да кар алай тафават ава: и формайрихъ инкарвилин жуьре авач. И кьетIенвили абур су­щес­твительнийриз генани мукьва ийизва.
     Кхьинра масдардикай ва адаз мукьва къуша формайрикай сад хьиз менфят къачуда. Мес: Адан мурад кIелна духтур хьун я. Адан мурад кIелна духтур хьунухь я. Гададиз кIанзавайди мехъерик фин тир. Гададиз кIанзавайди мехъерик финиф тир.