Къуба авадан жезва Хабарар  |  11(316) 2017  |  Гуьлхар ГУЬЛИЕВА
     Чи республикадин виридалайни иер районрикай тир Къуба йис-сандивай авадан жезва. Инин зегьметдал рикI алай инсанри хайи райондин абадвилер патал вири жуьредин алахъунар ийизва. Гьа и кар себеб яз Къуба вилик физва, ада гекъигиз тежер хьтин иервилерихъ ялзава. Ина агьалийрин гьалар хъсанарун патал герек тир къулайвилер арадал гъизва.
     Алай йисан 7-декабрдиз кьиле фейи вакъиаяр лагьайтIа, къубавияр патал сувариз элкъвена. Гьа юкъуз Азербайжан Республикадин Президент Илгьам Алиева ва сад лагьай ханум Мегьрибан Алиевади цIийи карханаяр кардик кутадай мярекатра иштиракна.
 
Кардик кутуна
 
     ЦIийи йисан вилик гьукуматдин патай къубавийриз къалурай къайгъударвилин чешнейрикай сад ина «ASAN həyat» комплекс кардик кутун хьана. И карханади Къубадин ва къунши КцIар, Хачмаз ва Шабран районрин 500 агъзур кьван агьалийриз къуллугъда. Ина 170 кIвалахдай чкаяр арадал гъанва. Гьа са вахтунда 45 кьван гуьгьуьллуяр и кардиз желб авунва. Карханада агьалийриз 32 жуьредин къуллугъар ийида.
     Комплекс 4 гьавадин идарадин дараматдикай ва 6 тIуьнар-хъунардай кIвалерикай ибарат я. Ина «ASAN» ва «ABAD» меркезар ва «ABAD» мектеб арадал гъанва. Къубадин «ASAN xidmət» меркез Президентди кардик кутуна. 
     «ABAD» мектебда халичачивилин, харусенятдин ва теориядин курсар тешкилнава. Виликай къвезмай йисуз ина хизанрин майишатар патал бизнесдин, маркетингдин, бухгалтериядин рекьяйни курсар арадал гъида.
 
Гамарин кархана
 
     Къубадин гамар дегь чIаварилай вириниз сейли я. РагъэкъечIдай патан уьлквейрин, Урусатдин, Европадин савдагарри Къубадин халичаяр рикI алаз къачудай. Исятда районда гамар храдай са шумуд кархана ава. Абурун сиягьдиз мад са кархана – «Azərxalça» ASC-дин филиални алава хъхьанва.
     ЦIийи филиал кардик кутадай мярекатдал Азербайжан Республикадин Президент Илгьам Алиева лагьайвал, Къуба гьамиша халичачивилин меркезрикай сад хьанвайди я. Ина и сенят гзаф вилик фенва. ЦIийи филиалди къубавийриз мадни чIехи агалкьунар къазанмишдай мумкинвал гуда.
     Филиалда гамар хразвай 150 дишегьлиди ва 12 идарадин къуллугъчиди кIвалахда. Ина шикилар чIугвадай ва сагъламвал хуьдай кIвалер, гьамбархана, хуьрекхана, гамар маса гудай зални кардик кутунва. 43 гамар храдай тарарал Къуба, КцIар, Хачмаз ва Сиязан районрин хуьрериз талукь тарихдин ва са куьнивни гекъигиз тежедай хьтин чкадин гиширрин гамар храда.
 
ТIаратIдин музей
 
    Алай йисан мартдилай гатIунна эцигай музейдин дарамат вижевайди хьанва. Ина чIехи зал, идара ва куьмекчи кIвалер ава. Зал 6 хилекай туькIуьрнава. Ина Азербайжандин ханлухрин девирриз талукь картаяр, абурун тIаратIар, юкьван виш йисарин женгчияр къалурдай манекенар, XIX виш йисарин Азербайжандин шегьеррин гербер, дегь чIавара акъуднавай ракьун ва кагъаздин пулар къалурзава.
    Музейда гьакIни Азербайжандин Халкьдин Жуьмгьуриятдиз талукь документар, Азербайжандин СССР-дин чIавуз ва аслу тушир аямда кьабулнавай конституцияяр, гербер, тIаратIар, почтадин маркаяр, орден ва медаларни кIватIнава. И кархана Къубадин ТIаратIдин Майданда кардик кутунва. Кьил акъуддай ксари лугьузвайвал, музейди агьалияр ватанпересвилин руьгьда тербия авунин карда чIехи тир роль къугъвада.
 
Гуьлхар ГУЬЛИЕВА