Ватанэгьлийрин мярекат Хабарар  |  11(316) 2017  |  САМУР
     14-сентябрдиз Дагъустан Республикадин меркез тир Магьачкъала шегьерда кьиле фейи ватанэгьлийрин форум рикIелай тефирди хьана. Вичин макьсад лезгияр, аварар, даргияр, Дагъустандин маса халкьар кIватIна сад авун тир и мярекатдиз Россиядай, Азербайжандай, Туьркиядай, Сириядай, Иракдай, Иорданиядай, Германиядай, Франциядай, Израилдай, Украинадай, Белорусиядай, Эстониядай, Къазахстандай цIудралди чи ватанэгьлияр атанвай.
     Форумдал лагьайвал, алай вахтунда дуьньядин 40 уьлкведа Дагъустандай тир 3 миллиондилай гзаф чи ватанэгьлияр яшамиш жезва. Виридалайни чIехи диаспора Туьркияда ава. Ина чи ватанэгьлийрин кьадар 500 агъзур кас я.
     Мярекатдал Дагъустан Республикадин кьил Рамазан Абдуллатипова «Самур» газет марагълуз акъатзавайди, ада халкьарин арада дуствал мягькемарзавайди кьилди къейд авуна. Эхирдай Дагъустандин маса уьлквейрихъ галаз алакъаяр мягькемарзавай ватанэгьлийриз, гьабурукай яз С.Керимовадиз «Хайи чил кIанивилин» медаль гана.