ЦIийи сувар – «Ахцегьин ичер» Хабарар  |  10(315) 2017  |  САМУР
     Алай йисан 17-ноябрдиз Ахцегь районда цIийи сувар къейд авуна. Райондин кьил Осман Абдулкеримова лугьузвайвал, «Ахцегьин ичер» тIвар ганвай и сувар къейд авунин макьсад ра­йонда багълар кутунин крар, гьакIни хуьруьн майишатдин маса хилер вилик тухуз куьмек гун я.
     Суварин юкъуз Дагъустан Республикадин хуьруьн майишатдин министр Керимхан Абасов, республикадин чIехидан векил Энрик Муслимов, Кьиблепатан Дагъустандин районрин кьилер Ахцегьиз илифна. КIвенкIве Ахцегь шегьерда Дагъустандин халкьдин шаир Хуьруьг Тагьиран тIварунихъ галай цIийи парк кардик кутуна.
     Ичерин сувар Советрин Союздин Игит Валентин Эмирован тIварунихъ галай паркда давамарна. Ина Ахцегьин цIудралди машгьур ичерин ва чуьхверрин сортари, малдарвилин магьсулри ва районда гьасилзавай маса недай-хъвадай суьрсетри вири гьейранарна.
     Хуьруьн майишатдин министр Керимхан Абасова къейд авурвал, эхиримжи йисара Ахцегьа хуьруьн майишат чIехи камаралди вилик физва, цIийи багълар кутазва, малдарвилин комплексар арадал гъизва, хам чилерикай хъсандиз менфят къачузва. Гьа и карди ахцегьвийриз чпин дуланажагъ генани хъсанардай мумкинвал гузва.
     Суварин эхирда Ахцегь райондин медениятдин кIвалин ансамблди чIехи концерт гана.