Гуьлжагьан Мисриханова CтIал Сулейманан райондин КIахцугърин хуьре дидедиз хьана. 1979-йисуз уьмуьрдин юлдашдихъ галаз санал Туркмениядин Ашхабад шегьердиз куьч хьана. 2004-йисалай вичин хизандихъ галаз санал Голландиядин Уьтрехт шегьерда яшамиш жезва. Ада кьуьзуьбуруз къуллугъзавай идарада кIвалахзава. Адан “Кьисмет” ва “Пуд стIал” тIварар ганвай кьве ктаб чапдай акъатна.
Ам зун я
Акъатнава зун яргъариз,
Захъ вил жемир ви.
Сефил хьайла, хкваш рикIел
Заз на гайи кьин.
Хатадай хьиз гар атана,
ГатайтIа дакIар,
Ам зун я ви патав атай,
Закай гуз хабар.
АватайтIа ви дакIардин
Гуьзгуьдал стIал,
Зун марф хьана мад атанва
Са кьил чIугваз вал.
ХьайитIа ви гуьгьуьл ачух,
Манийриз яб гуз,
Зун ава ви рикIин къене,
Ашкъид шем хьиз куз.
Ракъин нурар аватайтIа
ДакIардай кIвализ,
Ам зун я ваз темен гузвай,
Дерт хьайла рикIиз.
Геж атана лугьумир
Атанва къе зун ви патав,
Геж атана лугьумир заз.
РикIин къене кузвай ялав
Жувахъ галаз гъанва за ваз!
Терез хьанач гъам алцумдай,
Багьна хьанач вав гатIумдай.
Геж я лугьуз рахкурмир зун,
КIан хьайиди са вун я, вун.
Къекъведалди сал жигъирра,
Галатна зун жагъуриз бахт.
Лугьумир заз геж атана,
Дуьз рехъ такваз, акъатна вахт.
Цифер алай кьисметдал зи,
Хъуьрезвачир ракъин нурар.
Зун гьикI къведай лагь, рикIиз ви?
Агалнавай адан варар…
Зи рикIе хьухь
Зун гьуьл я, вун зи лепе хьухь,
Жагъура заз фидай са пад.
Хиял хьана зи рикIе хьухь,
Физ хьайитIа яргъариз мад.
Вун чуьл хьурай, зунни цуьквер,
Марф къвайила гуьрчег хьайи.
Селдин хурук ква а рекьер,
Вун хъфейла зун тек хьайи.
Вун рагъ хьайла зун циф хьурай,
Нур чуьнуьхиз къекъведайвал.
Зун ви багъдин емиш хьурай,
Вун захъ хъсан гелкъведайвал.
Вун дагъларин дерин булах,
Зун булахдин михьи яд хьуй.
Зи кIанивал вине яхъ на,
Инсаф ая, минет-дад хьуй.
Зун гар жеда ви гуьгъуьна,
Къекъведа зун йифиз-юкъуз.
Зун яр жеда, шел - туьтуьна,
Вилера хъвер жеда ваз гуз.