Рейсадвилин йис Хабарар  |  1(306) 2017  |  "САМУР"
     Азербайжан Республикадин Президент Илгьам Алиева 2017-йисан 10-январдиз къул чIугур серенжемдив кьадайвал, алай йис чи уьлкведа «Исламдин рейсадвилин йис» тирди малумарнава. Юкьван виш йисара Азербайжан Исламдин цивилизациядин меркезрикай сад тир. 743-йисуз Шамахида эцигнавай Жуьмя мискIинди, маса тарихдин гуьмбетри ва уьлкведин музейра хуьзвай къадим гъилин хатIарини икI тирди субутзава.
     Диндихъ авсиятда къадагъаяр эцигай Советрин девирда Азербайжанда 17 мискIин авайтIа, гила абурун кьадар 2000-далай гзаф я. Абурукай 300 мискIин тарихдин гуьмбетар хьиз хуьзва. Эхиримжи йисара Исламдин медениятдин гуьмбетрикай тир Бибигьейбет, Тезепир, Эждербег, Шамахидин Жуьмя мискIин ва Генже шегьердин «Имамзаде» комплекс цIийи кьилелай гуьнгуьна хтунва, гьакIни Кьиблепатан Къафкъаздин виридалайни чIехи Гьейдар мискIин эцигна кардик кутунва.
     2009-йисуз Баку Ислам медениятдин меркез яз малумарна. 2018-йисуз Нахичеван ихьтин меркездиз элкъведа. Алай йисуз Бакуда IV Исламдин Рейсадвилин Къугъунар кьиле фида.