XVII асирда яшамиш хьайи сейли лезги шаиррикай садни Лезги Къадир я. Ам Куьре вилаятда дидедиз хьана. Ингье ам дидедиз хьайи хуьр икьван гагьди тайинариз хьанвач. Халкьдин меце Къадир “Къураба” лакIаб алай шаир хьизни ама. 

     Вичин хайи кIвале, хайи хуьре са шад югъ такур Къадир хуьрба-хуьр, элба-эл, къураба хьиз къекъвез хьана. Адавай хайи халкьдин кьилел атай мусибатар, миллет маса гузвай ксарин алчахвилер эхиз хьанач ва ада и темадай азим шиирар кхьена. Халкьдин мецин эсерра чал Къадиран тIвар аваз са кьадар маниярни гьалтзава. И манияр гъам-хажалатдив ацIанвай рикIин сузаяр я.

 

Хажалатрин кьакьан кIеле

ЦIуьриз тежер, фагъир я зун.

Бахтсуз хана, хайи кIвале

Шадвал такур Къадир я зун.

 

Заз Къураба Къадир лагьай,

Руш ви гафар гьикI эхин за?

Ашкъидикай са пай тахьай,

И дерт суруз гьикI тухун за?

 

     Манийрай аквазвайвал, Къадир хъсан шаир хьиз, хъсан ватанпересни тир. Вичин хайи Ватан бахтлу яз акун адан рикIин мурад тир. Амма а девирда адан мурадар кьилиз акъатун мумкин тушир. Адавай халкьдин кьилел къвезвай мусибатар гьа ижтимаи къурулушдихъ галаз алакъалу тирди, и къурулуш дегишар тавуртIа, балаярни алудиз тежерди кьатIуниз жезвачир.

 

Пакаман шагьвар

 

Пакаман шагьвар, зи фагъир гьалдикай

Агакьра ван яргъа авай эллериз.

Зулумрикай фелекдин, чав къалрикай,

ЦIигел хьункай, лагь, зун къизилгуьлериз.

 

Зи гъам чIугваз, дидед рикIел хьанва тIагъ,

Кими тежез вилерилай туькьуьл нагъв,

Зи бахт, вичел хажалатрин алаз дагъ,

Аватзава дерин-дерин вирериз.

 

Гурлу селлер авахьзава азгъундиз,

Къати я гар элкъвезавай чайгъундиз.

Лейлидивай къакъатнавай Межнун хьиз,

Авара яз катнава зун чуьллериз.

 

Жуван миллет маса гун туш жедай кар,

Мусибатри тавурай чаз дуьнья дар,

Чи миресрив агакьра зи дуьз хабар,

Аватункай лагь зи гими гьуьлериз.

 

Къадир я зун шадвал такур гьич кIвале,

Хажалатрин залан пар я зи шеле,

Ажалди вахт ганва, кьенвач зун гьеле,

Кхьена, дерт пайзава за эллериз.