300 лагьай тилит Барка  |  6(300) 2016  |  "CАМУР"
Играми кIелдайбур! Газетдал рикI алай куь куьмекдалди чна «Самурдин» 300 лагьай тилитни чапдай акъудна. Гьикьван кIевера акIанатIани, чна дидед чIалал акъудзавай «Самур» акъвазарнач. Вучиз лагьайтIа ам чи республикадин авай-авачир лезги газет я. Вучиз лагьайтIа ам фадлай халкьдин трибунадиз элкъвенвай, адан гаф лугьузвай, хайи чIал, меденият, ацукьун-къарагъун хуьзвай женгчи я. Гила «Самурдин» суракьар къецепатан уьлквейрайни къвезва. Адахъ Россияда, Дагъустанда, Германияда, Туьркияда, Къазахстанда, Уьзбекистанда, Къиргъизистанда, са гафуналди, дуьньядин 20-далай гзаф уьлквейра кIелдайбур ава.
Гаф атай чкадал лугьун. 1997-йисалай инихъ «Самурдиз» гьукуматди, яни грант гудай тешкилатри куьмек гайиди туш. Чи куьмекни даях кIелзавайбур, хайи чIалал рикI алай, чкайрал газет кхьиз тазвай кьегьал лезгияр я. Чна ара датIана гьукуматдивай куьмекар тIалабнатIани, грантар къачунин паталди проектар туькIуьрна вуганатIани, республикадин чиновникри вучиз ятIани «Самурдиз» куьмек ганач. ГьакI ятIани чун руьгьдай аватнач. Чна гележегдихъ умуд кутуна вилик камар къачуна. Чи зегьметар квахьнач. «Самурдикай» халкьдин милли кьетIенвилер, чи руьгьдин чешмеяр хуьдай, лезгияр хъсан крарихъ ялдай газет, камаллувилин хазина, лезги чIал вилик тухудай женгчи хьана. Гьавиляй Азербайжандин ва къецепатан уьлквейрин 97 газетди ва журналди «Самурдикай» макъалаяр чапна.
Алатай 24 йисан къене чи виридалайни чIехи агалкьун хайи чIал хуьн ва вилик тухун хьана. Газетди и кар патал ара датIана женг чIугвазва. Гьавиляй кIелзавайбуру «Самурдиз» чIалан женгчи лугьузва.
Газетди цIудралди къагьриманар, икьван гагьди халкьдиз тийижир шумудни са шаирар винел акъудна. Элдин шаиррин яратмишунрикай кIелзавайбуруз малуматар гана. Ара датIана халкьдин мецин эсерар кIватIна. «Самурди» жегьил къелемэгьлийриз мукьувай къайгъу къалурна. 70-дав агакьна жегьилрин шиирар сифте яз газетдин чинриз акъатна. Чна куьмек гайи жегьил авторрикай са шумудан кьилди ктабар чап хьана.
Чна цIийи рубрикаяр кардик кутазва, важиблу месэлаяр къара­гъарзава, халкьдихъ галаз кам-камуна аваз фин патал газетдин чинриз чIалакай, тарихдикай, этнографиядикай, медениятдикай, чи хуьрерин гьаларикай, са гафуналди, лезгийрин тIал алай месэлайрикай ихтилатзавай макъалаяр акъудзава. И рехъ гележегдани давамарда.
2012-йисан мартдиз чна «Самурдин» 20 йисан юбилей къейд авуна. Бакуда Уьзейир Гьажибегован тIварунихъ галай Музыкадин Академияда гзаф гурлудаказ кьиле фейи а мярекат къедалди виридан рикIел хъсандиз алама. Виликай къвезмай 2017-йисуз «Самурдин» 25 йисан юбилей къейд ийида. Ам виликан юбилейдив гекъигайла генани гурлуди хьана кIанзава. Гьавиляй чна кIелдайбурувай редакциядиз чпин теклифар ракъурун тIалабзава. Бубайри лагьайвал, жуван вацI жува яцIу авуна кIанзава. Ша чна гъил-гъиле гана чи тарихда гел тадай лайихлу мярекат арадал гъун патал къенин йикъалай жуван къуватар кардик кутан! 
 
"CАМУР"