Сад лагьай гъилер тир заз ихьтин мярекат акваз. 800-далай виниз кас гьакьзавай зал кьиляй-кьилди ацIанвай. 200-далай гзаф инсанар чка тахьана кIвачел акъвазнавай. Абуру эхирдал кьван кIвачел акъвазнаваз мярекат вилив хвена. Садбур залдин юкьва авай гурарин кIарарал ацукьнавай. На лугьуди, хуьруьн деминиз атанвай инсанар. Виридан чина хъвер авай, эрк кваз, рикI алаз агатнавай абур мярекатдив.
Алай йисан 31-майдиз Магьачкъалада А.С.Пушкинан тIварунихъ галай Урусрин Драмтеатрда кьиле фейи Дагъустандин халкьдин артист Исамуддин Агьмедован 60 йисан юбилейдиз талукьарнавай няни халисан халкьдин суварин мярекат хьиз рикIел аламукьна зи. Ам вичихъ алакьунар авай жегьил шаир Владик Батманова ва са иер руша лезги ва урус чIаларал тухузвай, ана къени ихтилатар кьиле физвай, дидед чIалал манияр лугьузвай. Юбилярдин – сейли чIагъанчи Исамуддин Агьмедован 60 йисан юбилейдин юкъуз ада Дагъустандин Гьукуматдин Телевиденида лезги чIалал арадиз гъана тухузвай «Вахтар ва инсанар» гунугдинни 10 йис тамам хьанвай. Дамах кутадай и вакъиаяр вини дережада къейд авуни виридак руьгь кутунвай.
Дагъустан Республикадин кьил Рамазан Абдулатипова юбилярдиз ракъурай тебрикдин чар кIелна куьтягьайла залди гурлудиз капар яна. Адан гуьгъуьнаваз республикадин милли сиясатдин министр Т.Гамалеян тебрикдин чар кIелна. Чи сейли шаир Арбен Къардаша, лезги театрдин режиссер Мирзебег Мирзебегова, Бакуда акъатзавай «Самур» газетдин редактор Седакъет Керимовади ва масабуру юбиляр тебрикна адаз мадни чIехи агалкьунар тIалабна.
Харусенятдин векилри: маничийри, ашукьри, кьуьлдайбуру мярекат гурлу авуна. Роза Максумовади, Фаризат Зейналовади, Руслан Пирвердиева ва маса маничийри межлисдик дад кутуна. Ингье виридалайни гзаф капар а йифиз залди Бакудай атанвай кьве сеняткардиз ягъана. Юбилярдин устад ва чIехи дуст, Азербайжан ва Дагъустан республикайрин халкьдин артист Афтандил Исрафиловаз ва «Сувар» ансамблдин маничи Жавагьир Абдуловадиз. Ихьтин гурлу, зал юзурдай капар заз фадлай ван хьаначир. «Халисан сенятдиз асул къимет халкьди гуда», - лагьана фикирна за.
Мярекатдин са легьзе хъсандиз рикIел аламукьна зи. Афтандил Исрафилова юбилярдивай вичихъ галаз санал чIагъан ягъун тIалабайла, ада жаваб гана: «Завай зи устаддин патав чIагъан гъиле кьаз жеч!»
И гафаралди Исамуддин Агьмедова дамах гвачир сейли сеняткарди хьиз мад гъилера халкьдин патай чIехи гьуьрмет къазанмишна.
С.КЕРИМОВА