Магьсим Магьсимов Поэзия  |  3(297) 2016  |  
     
 
 
 
 
 
 
 
 
 
 
 
 
 
 
 
 
 
 
 
 
 
   Бубаяр
 
     Чими юкъуз лугьуда:
     - Са пел кIанда гар алай.
     Ава бязи бубаяр,
     Анжах буба тIвар алай.
 
     Агь, бубаяр, бубаяр…
     Бармак тахьай кьилелни.
     Жуван хайи хтулар,
     Кьан тийидай метIелни.
 
     Къимиш тийиз хтулриз
     Нагагь къефетни булка,
     Куьн ава пивнойра хъваз,
     Кьуна гъиле путулка…
 
     Балайрин гъил кьан тийиз,
     АцIанач хьи, гьич куь нефс.
     И дуьньяда вуч патал,
     Яшамишда куьне бес?!
 
     Са бисмиллагь лагьана,
     Фу кьан тийиз гъилени,
     КIусни гьуьрмет авачир
     ИкI кIвалени, хуьрени.
 
     Куьмек тушир сад-садаз
     Гъил-гъиливай къакъатрай!
     Гьа куьн хьтин бубаяр,
     Авач патаз акъатрай!
 
   Я шаир
 
     Шаирвал дуст, сенят туш,
     Ам Аллагьди бязибуруз
     Нагагь гузвай са пай я.
     Бязибуруз тIвар паталди,
     Маса кеспи тахьай чIавуз,
     Кхьиз-чIуриз кьарай я.
 
     Ава бязи «шаирар» чахъ,
     ТIвар паталди алахъна гьакI,
     Ктабарни акъуддай…
     Анжах чавай а ктабрай,
     Гьич кьве цIарни жагъур жезвач
     КIелна лезет хкуддай.
 
     Ам ктаб туш, дугъриданни
     КIелай касдин рикIиз тихтих
     Къвез авачтIа, «я шаир».
     Ам шиир туш, чи кIелчийри,
     Кьурла гъиле, гьакI вилерив
     Нез авачта, «я шаир».
 
     А шиирар шиирар туш
     Нагагь гьакIан буш гафар я,
     Мана, метлеб авачир.
     Беябурмир гьакI жуван тIвар:
     Чап ийиз гуз и «ктабар»
     Кепекдикни галачир.
 
     РикIихъ галаз ихтилат
 
     Вучиз къе икI чIулав ятIа?
     ЧIимел югъ хьиз я рикI вун.
     И мукьвара дегишарнай,
     ЧIугуна харж за, рикI вун.
 
     Анжах хьи, вун дегиш тахьай,
     Ви тIул тIул я, кар гьа кар.
     Дуьньядани гьакьзамач вун,
     Дуьньяни ваз хьанва дар.
 
     Шаирдин рикI ятIани, вун
     Сулейман туш, Эмин туш.
     Дуьнья гуьзел, уьмуьр гуьзел…
     Вучиз бес вун секин туш?
  
     ГьакI ятIани акъваз тийиз,
     Зун галатна лагьана:
     Ватан патал, халкь паталди,
     Вун кузва икI датIана.
 
     Агь, рикIерни акуна заз…
     Дерт, хажалат авачир.
     Вучзава за а рикIикай,
     Лезгид иви галачир?
 
     Вун гьулдан я, хан тийидай,
     Сефил ятIан я рикI вун.
     Виш намерддин рикIик галаз
     Дегишардач за рикI вун.