Мирзали рустамов Эпитафия  |  2(296) 2016  |  "САМУР"
     Лезги эдебиятда лайихлу чка кьунвай, комедия жанр виликди тухвай чи сейли къелем­эгьли Мирзали Рустамован тIвар кIелдайбуруз хъсандиз чида. Вичин эсерра шумудни са рикIел аламукьдай образар яратмишай ада чи драматургиядик пай кутуна.
     1929-йисуз КцIар ра­йондин Яргунрин хуьре дидедиз хьайи М.Рустамован шиирарни гьикаяяр 1960-йисалай газетрин, журналрин, кIватIалрин чинриз акъатнай. Вичин хайи хуьруьз эхирдал кьван вафалу хьайи Мирзали Рустамов Азербайжандизни Дагъустандиз Яргуна яшамишиз, ина туькIуьрай драмдин   эсерри сейли авунай.
     М.Рустамова хуьруьн юкьван мектеб куьтягьайдалай гуьгъуьниз Къубадин Муаллимрин Институт ва Азербайжандин Гьукуматдин Педагогикадин Институт акьалтIарнай. Яргьал йисара хайи хуьре муаллимвал авур М.Рустамова аялриз азербайжан ва лезги чIаларин тарсар ганай. 
     Автордин “Кьилиз те­­фей гастрол”, “Гьайиф, алатай йикъар”, “Гьемдуллагьан хам хиялар”, “Санитар”, “ЦIийи завмаг”, “Меккедай хтай гьажи”, “Гьава ахъа жез­ва”, “Тахсиркар вуж я” пьесайри КцIарин Гьукуматдин Лезги Театрдин репертуарда кьетIен чка кьазвай. Адан са шумуд пьеса КцIар, Къуба, Хачмаз ва Худат шегьеррин сегьнейрал эцигнай.
     М.Рустамован “Кооператив ашнабазхана”, “Кефербег”, “Рекетирар”, “Етим Эмин”, “СтIал Сулейман” хьтин пьесаяр Дагьустан Республикадин СтIал Сулейманан тIварунихъ галай Лезги Театрдин сегьнедал эцигнай.
     И йикъара чи къелемэгьлиди яргъал фейи начагьвал себеб яз вичин дуьнья дегишарна. Къени къилихрин и ватанперес касдин экуь къамат ам чидайбурун рикIера амукьда. Аллагьди рагьмет авурай!