Дербентдиз Азербайжандин савкьват Хабарар  |  9(292) 2015  |  "Самур"
     Алай йи­сан 5-октябрдиз Дербент­дин 4-нумрадин юкьван мектебда му­ал­лимрин югъ гурлудаказ кьиле фе­на. Иниз атан­­вай мугьманрин арада Да­гъус­тандинни Азер­­байжандин вилик-кьилик квай инсанарни авай. Имни дуьшуьшдин кар тушир. Дербентда 1926-йисуз кардик кутунвай и мектеб гуьнгуьна хтун, гьакIни кьве гьавадин цIийи дарамат хкажун алатай йисуз Азербайжандин Гь.Алиеван тIварунихъ галай фондуни хиве кьунай. Вичихъ чIехи актдин зал, синифдин утагъар, методикадин кабинетар, зегьметдин тарсар тухудай карханаяр, фу недай чIехи зал авай цIийи дарамат эцигай фондуни куьгьне мектебдин къавни дегишарна, фасад цIийи кьилелай туькIуьрна. Куьгьне мектебдин корпусрикай садан кьвед лагьай гьава хкажна. 
     Мярекатдиз атай Дербентдин кьил Азади Регьимова, шегьердин депутатрин кIватIалдин кьил Мавсум Регьимова ва масабуру мектебдин коллективдиз сувар барка авуна. Дербентдин Ижтимаи Палатадин седридин заместитель, са чIавуз и мектеб акьалтIарай Сейран Регьимова лагьайтIа, муаллимар патал пишкеш яз 100 агъзур рубль чара авуна.
     Мярекатдал Гь.Алиеван тIварунихъ галай фондунин векилрикай Жейгьун Асланова фондунин Азербайжанда ва адан къеце пата тухузвай зурба кIвалахрикай малумат гана.
     Мектебдин аялри гьазурнавай чIехи концертда «Гуьнеш» ва «Каспий» кьуьлерунин ансамблри иштиракна.