Алпапакай мах Фольклор  |  8(291) 2015  |  В.КЕРИМОВ
     Лезги фольклордин чешнеяр 1881-йисалай 1915-йисал къведалди ара датIана акъатай «Къафкъаздин тайифаяр ва чкаяр къалурзавай материалар авай кIватIалди» (СМОМПК) гзаф чапнава. 1892-йисуз чапдай акъуднавай XIII – СМОМПК-да Кьасумхуьрел Абужафер Мамедова кхьенвай «Алпаб» лугьудай мавгьуматдин мах ава. 
     Махунай аквазвайвал, Алпаб вич иер, амма гзаф писди, чIуру крар ийидайди я. Ам кьилелай кIвачелди яру чIарари кьунва. Вични пуд йиса авай аял кьванди я. Ам гьидан гъиле гьатайтIани, я адан киф атIана, я тIуб атIана кIанда. И Алпапан тIуб, я киф аял хазвай дишегьли авай кIвализ тухвана, а дишегьлидин хъуьцуьгандин кьилик кутуна кIанда. АкI тавуртIа, Алпаб а аял хазвай дишегьлидин къенез фида, ахпа дишегьли рекьида.